Интегративците посочуваат дека Собранието, и две недели по трагедијата, не собрало сила ниту да одржи комеморативна седница „бидејќи партиската контрола врз институциите е посилна од моралната и општествената одговорност“
Кој се плаши од формирање анкетна комисија во Собранието со учество на сите политички партии и меѓународно набљудување од ОБСЕ, САД и Европската Унија, прашаа денеска од опозициската ДУИ нагласувајќи дека трагедијата во Кочани ја разоткрила вистината за целосното заробување на државата.
Од ДУИ обвинуваат дека Владата, не само што не превенирала катастрофа која цела година им била позната на надлежните институции, туку и го злоупотребила системот за да ги заштити одговорните.
„Прво, со политички притисок врз обвинителството – преку заплашување на обвинителот со партиски активисти на улица, потоа со иницијатива за негова смена, за на крај да му биде ветено останување на функцијата доколку игра по диктираните правила. Освен тоа, владата ги притисна медиумите, граѓанското општество и сите критички гласови, претворајќи ја државата во партиска алатка за амнестирање на виновниците. По трагедијата, наместо институционален одговор, сведочиме на селективна правда – обид да се префрли одговорноста на други, без истрага за оние кои навистина беа одговорни за превенција“,
се наведува во соопштението на ДУИ.
Интегративците посочуваат дека Собранието, и две недели по трагедијата, не собрало сила ниту да одржи комеморативна седница „бидејќи партиската контрола врз институциите е посилна од моралната и општествената одговорност“.
„Затоа, ги повикуваме пратениците да ја послушаат сопствената совест, да размислат за семејствата на жртвите, за довербата во системот, и да го потпишат барањето на ‘Европскиот фронт’ за формирање на анкетна комисија во Собранието. Селективната правда ќе биде извор на огромна недоверба и деформација на системот во иднина. ДУИ останува посветена на вистината, транспарентноста и правдата – и нема да дозволиме оваа трагедија да се затвори без целосна истрага со меѓународно набљудување“,
децидни се од Мала Речица.