ВМРО-ДПМНЕ излезе со податоци дека во текот на 2019 година се издадени 31 лиценца за производство на канабис за медицински цели, а дваесетина нови лиценци се во постапка и чекаат одлука од владата
Десетина фирми добиле дозвола од владата за одгледување канабис за медицински цели во периодот од средината на декември 2019 до 15 јануари годинава. Според податоци од „Службен весник“, повеќето од решенијата се издадени за време на претходната влада, а на нив е потпишан доскорешниот премиер Зоран Заев.
Генералниот секретар на ВМРО-ДПМНЕ, Игор Јанушев, обвини денеска дека СДСМ и, како што рече, Заеви, настрана од пропишаните одредби во Законот, за само неколку месеци дозволиле хипер-продукција на лиценци за канабис. Според Јанушев, од мај 2016 година, кога беше донесен Законот за опојни дроги, па до мај 2018 година биле издадени само пет лиценци за одгледување канабис и две лиценци за екстракција. Затоа, пак, само во 2019 година, според него, владата издала 31 лиценца за одгледување на канабис, а дваесетина други се во постапка и чекаат одлука од владата. Во истиот период, како што тврди Јанушев, се издадени уште две лиценци за екстракција на канабис. Голем дел од овие фирми што добиле лиценци, како што вели, се поврзани со СДСМ.
Во периодот од средината на декември до средината на јануари, последното одобрение за производство на канабис е објавено во „Службен весник“ на 15 овој месец. Единствено на оваа одлука е потпишан техничкиот премиер Оливер Спасовски. Претходните одлуки се на политичката влада, која имаше мандат до 3 јануари.
Станува збор за одобрение за одгледување канабис што го добила фирмата ГМ ЛАЈТ ДОО – Скопје. Службените податоци за оваа фирма датираат од 13 декември минатата година, односно еден месец пред да ја добие дозволата за производство на канабис. Како нејзин управител е заведен Константинос Караниколаоу, кој е и еден од сопствениците, покрај БЛЕК ГЛОВ СОЛУШНС ЛТД и КРИКАМАРА ИНВЕСТМЕНТ ЛТД.
Одлуки
На 18 декември минатата година владата носи одлука со која и ја одзема дозволата на фирмата КУАЛИТИ ГРУОП ДОО – Скопје. Тоа е компанијата во која како еден од сопствениците се јавува српскиот бизнисмен Предраг Колувија, кој пред неколку месеци беше уапсен во неговата земја, при што главното дело што му се става на товар е нелегално одгледување марихуана.
По одземањето на дозволата на фирмата на контроверзниот бизнисмен од Србија, владата доделува нови дозволи на десет фирми за одгледување медицински канабис. Одобрение добива КАНБИО МЕДИКАЛ ДОО – Скопје. Како нејзини сопственици се јавуваат ГРЕЕН МЕДИЦАЛ ДОО – Кавадарци и МАЦЕДОНИА ГРОВВТХ ИНВЕСТМЕНТС ИНЦ. Како управители се заведени Бурим Исмаили и Димитер Кондакциу, кои се јавуваат како сопственици и на други фирми во земјава.
Дозвола за одгледување канабис е доделена и на МАР МЕДИКА ДОО – Куманово чии сопственици се Друштвото за градежништво и трговија КВАЛИТЕТ-ПРОМ од Куманово и Друштвото за производство, трговија и услуги УПМ – ГРУП ДООЕЛ – Куманово.
ЦБД МЕДПЛАНТ ДОО од с. Борисово, општина Ново Село, исто така е на списокот на компании што во декември добиваат одобрение од владата за одгледување марихуана за медицински цели. Како сопственици на оваа фирма се заведени три физилки лица од Ново Село. Во ист ден, уште една фирма од Струмичко добива дозвола за производство на канабис. Тоа е ЛИФЕ ПЛАНТ ДОО од Струмица. Како нејзини сопственици се заведени Снежана Стојановиќ и Иван Проданов од Струмица.
Прилепската фирма ГРЕЕН МЕДИКАЛ е уште една на листата со дозвола за производство на канабис, која е поврзана со три лица од Тетово – Насер Ибиши, Кренар Ибраими, Бурим Ибиши, поврзани со други фирми за градежништво и трговија од Тетово. Следна на листата е ЊУ ГАРДЕН ФАРМА од Скопје.
ЕНДО КАНА ДОО – Старо Нагоричане е, исто така, на списокот на одгледувачи на медицински канабис што добиле дозвола од владата во изминатиот месец. Фирмата има петмина сопственици – физички лица. Владата дала дозвола за одгледување канабис и на КРУШЕВО ВЕЕД ИНТ ДОО – Скопје, која има шестмина сопственици, од кои пет физички лица плус компанијата АНГО ДООЕЛ – Скопје. Кон крајот на декември дозвола добива и ФРСТ МЕДИКАЛ КАНАБИС – Битола, каде што како сопственичка и управител се јавува Надежда Герзовска.
Обвинувања
Јанушев обвини денеска дека има инфлација од лиценци на фирми блиски до власта и неконтролирано производство на марихуана.
„ВМРО-ДПМНЕ не кочи закони во интерес на граѓаните. ВМРО-ДПМНЕ кочи закони кои се од личен интерес на Заеви. ВМРО-ДПМНЕ во 2016 година го донесе законот за одгледување канабис за медицински цели и Македонија беше единствена држава во Европа заедно со Холандија, но со јасно дефинирани одредби и високи критериуми кои мора да се исполнат, а не земјава да се претвори во оаза за канабис за милионите на Заев“,
рече Јанушев.
Јанушев рече и дека во постојниот закон, кој е на сила, јасно е припишано кои се условите кои мора да ги исполнува одредена фирма доколку сака да добие лиценца за одгледување канабис. Еден од условите, како што вели, е фирмите апликанти да поседуваат елаборат за одгледување на канабис во рок од 5 години, како и која е намената на произведеното количество.
„Според нашите информации, најголем дел од овие 31 лиценца во 2019 година, се издадени според непостоечки закон, односно се незаконски. Овие фирми имаат елаборати во кои јасно пишува дека ќе извезуваат произведен сув цвет од канабис, што практично и не е возможно согласно постоечкиот закон, каде што извоз на канабис е возможен доколку е завршена екстракција. Според нашите информации, Министерството за здравство не врши воопшто инспекциски надзор колку канабис е одгледан кај голем дел од компаниите, па огромна количина од канабисот се продава на црно за огромни суми на пари, што докажува дека Заеви ја направија Македонија како Колумбија и Лазарат“,
обвинува Јанушев.