Новата партија ќе има заеднички штаб, информативен центар, заеднички кандидати, заедничка програма и листи на заеднички советници на претстојните локални избори, вели Меџити
Од коалицијата „Вреди“ ќе произлезе нов политички субјект, наредната недела почнуваат процедурите, најави првиот вицепремиер и лидер на Демократско движење, Изет Меџити.
Вицепремиерот Меџити, во поткаст за Телеграфи Македонија на албански јазик, информира дека новата партија ќе има заеднички штаб, информативен центар, заеднички кандидати, заедничка програма и листи на заеднички советници на претстојните локални избори.
Меџити истакна дека сѐ уште не дефинирале кој ќе биде претседател на партијата и оти тоа не претставува проблем, бидејќи, како што рече, главната цел е обединување и подобра организација пред локалните избори.
„Јавно можам да кажам дека ги читам гласачите кои бараат спојување на ’Вреди’ во еден субјект. Ниту сум тврдел, ниту тврдам дека сум лидер на ’Вреди’. Ме интересира концептот. Не е важно кој ќе биде претседател“,
изјави Меџити.
Тој додава дека имињата на кандидатите за градоначалници на претстојните избори сѐ уште не се дефинирани.
Најавите на Меџити за нова партија следуваат само неколку дена по одлуката на централното претседателство на Алијансата за Албанците, предводено од Арбен Таравар, кое одлучи на претстојните локални избори да понуди сопствени листи со кандидати за советници. Како што изјави Таравари по седницата, оваа одлука нема да придонесе за промени, односно дека остануваат како партија во рамки на коалицијата „Вреди“ и во состав на Владата.
Меџити тогаш на прес-конференција заедно со лидерите на Беса, Биљал Касами, и на Алтернатива, Зеќирија Ибраими, ја критикуваше одлуката на Таравари со обвинување дека е донесена во интерес на ДУИ.