Специјалниот холандски пратеник за миграции, амбасадорот Јост Кларенбек во интервју за МИА вели дека независно дали сме во ЕУ или не, земјата мора да соработува со соседите. Единствено, вели на тој начин сите земји во регионот може да постигнат добар резултат, бидејќи ниту една држава не може сама да се справи со приливот на мигранти.
„Целосното распоредување на силите ФРОНТЕКС во Северна Македонија ќе помогне за заштита на границата од илегална миграција на најдобар можен начин, но исто така ќе го зголеми и трансферот на знаење со останатите европски земји”,
вели Кларенбек.
Кларенбек, кој во земјава престојуваше на дводневната Министерска конференција за одржливо управување со миграциите во Западен Балкан во организација на Министерството за внатрешни работи и Канцеларијата на Меѓународната организација за миграции (ИОМ), смета дека Конференцијата за одржливо управување со миграциите во регионот во Скопје се одржа во вистинско време, со оглед на порастот на бројот на илегални мигранти во последниот период и таа претставуваше добра можност за споделба на искуствата и утврдување на начините на меѓусебно помагање.
„Потребно е сите земји во регионот да преземат целосна одговорност, потребна ни е целосна регионална соработка и зголемување на знаењето и капацитетите на сите земји во регионот, но исто така и на Европската Унија”,
вели амбасадорот.
Тој не очекува зголемување на приливот на мигранти во претстојниот период, но, како што вели, подобро е да очекуваме нешто и да ја засилиме соработката, за да бидеме сигурни дека ако има зголемен мигрантски прилив, да можеме да работиме заедно и да го намалиме.
„Ако ги погледнете причините за илегалната миграција ги има многу – војни, прогони, климатски промени, социо-економски перспективи… Обично комбинацијата на сите овие фактори ги принудуваат луѓето на преселби. Затоа мора да соработуваме на меѓународно ниво за да бидеме сигурни дека ќе ги превенираме овие движења”,
смета Кларенбек.
На прашање дали балканската рута повторно станува популарна за мигрантите, тој вели дека илегалната миграција е во пораст на различни рути па затоа и „балканската рута“ дефинитивно бележи раст. Според податоците од ФРОНТЕКС бројката на мигранти кои пристигнуваат е двојно зголемена за разлика од лани, а најчесто мигрантите се од Сирија, Авганистан, Пакистан итн.
„Мораме да ги погледнеме бројките. Се уште гледаме дека тоа се мешани приливи на мигранти. Има многу Сиријци, но исто така и Авганистанци, Пакистанци, Индијци, Бангладешани и многу други. Да, има многу Авганистанци, но тие не се доминанта група и не очекувам наскоро да станат доминантни. Но, подобро да очекуваме нешто и затоа мора да ја засилиме нашата соработка, за да бидеме сигурни дека ако има зголемен прилив, ќе можеме да работиме заедно и да го намалиме и да бидеме сигурни дека ќе ја направиме најдобрата можна брана за миграцијата”,
вели Кларенбек.
Тој го поздрави потпишувањето на Договорот за ФРОНТЕКС со Северна Македонија и вели дека на со тоа ќе се помогне за заштита на границата на најдобар можен начин, но исто така ќе го зголеми трансферот на знаење, капацитетите итн. помеѓу Северна Македонија и останатите европски земји.