Амбасадорот на Кина во Париз го навлече гневот на голем број држави откако во интервју за француската телевизиска мрежа ЛЦИ, прашан за позицијата на Кина за статусот на Крим, кој Русија го анектира во 2014 година, рече дека станува збор за нејасно прашање и дека земјите како Украина, кои беа дел од поранешниот Советски Сојуз, не можат да се потпрат на меѓународното право за да го бранат својот суверенитет
Официјален Пекинг се огради од коментарите на еден од своите дипломати кој го доведе во прашање суверенитетот на Украина и другите поранешни советски земји. Коментарите на кинескиот амбасадор во Париз, Лу Шаје, минатата недела предизвикаа бес, што доведе до многубројни повици Пекинг да се изјасни во врска со ставовите на дипломатот.
Имено, во интервју за француската телевизиска мрежа ЛЦИ минатата недела, кинескиот амбасадор беше прашан за позицијата на Кина за статусот на Крим, кој беше анектиран од Русија во 2014 година. Новинарот тврдеше дека според меѓународното право тој регион е дел од Украина. Лу одговори со сугестија дека станува збор за неразјаснето прашање и дека земјите како Украина не можат да се потпрат на меѓународното право за да го бранат својот суверенитет.
„Дури и овие поранешни советски земји немаат ефективен статус според меѓународното право бидејќи не постои меѓународен договор според меѓународното право кој би го специфицирал нивниот статус на суверени земји“,
рече тој, пренесува регионалниот сервис на Радио Слободна Европа.
Портпаролката на кинеското Министерство за надворешни работи Мао Нинг денеска се огради од ставот на Лу велејќи дека Пекинг ги почитува суверенитетот, независноста и територијалниот интегритет на сите земји и ги поддржува целите и принципите на Повелбата на Обединетите нации.
Таа рече: „Иако Советскиот Сојуз беше федерална држава и имаше статус на ентитет на меѓународното право како целина во надворешните работи… тоа не го негира фактот дека секоја република членка на Советскиот Сојуз има статус на суверена држава по распадот на Советскиот Сојуз“, пренесува Би-би-си.
Дел од земјите кои ги повикаа кинеските претставници да ги разјаснат коментарите на Лу беа и трите балтички држави – Литванија, Латвија и Естонија.
Литванскиот министер за надворешни работи Габриелиус Ландсбергис, цитиран од АФП, рече дека од дипломатите ќе биде побарано да објаснат дали позицијата на Кина е променета по прашањето за независноста.
„Ние не сме постсоветски земји, туку земји незаконски окупирани од Советскиот Сојуз“,
рече тој.
Инаку, рускиот претседател Владимир Путин често ја доведува во прашање независноста на Украина. Во говорот неколку дена пред почетокот на руската инвазија минатата година тој негираше дека Украина има „вистинска државност“ и рече дека земјата е составен дел од руската историја и култура.
Другите министри за надворешни работи на ЕУ, исто така, ги осудија коментарите на Лу и најавија состанок за денеска на кој треба да разговараат на оваа тема.
Помошникот на украинскиот претседател, Михаило Подољак, исто така го доведе во прашање толкувањето на меѓународното право на Лу и ја опиша неговата позиција за Крим како апсурдна.
Инаку, Кина важи за сојузник на Русија и досега не ја осуди инвазијата на Украина.
Кина се гледа себеси како главен играч во напорите за воспоставување мир во Украина, но во меѓувреме стана најважен трговски партнер за Русија поради западните санкции предизвикани од инвазијата, а многумина на запад се сомневаат во нејзината непристрасност по ова прашање.