Шефот на централниот регион Виница исто така објави на Телеграм дека таму има мртви и ранети, по нападот на станиците Жмеринка и Козјатин
Во меѓувреме, руското Министерство за одбрана соопшти дека со ракети со долг дострел се погодени украинската нафтена рафинерија и воени постројки Кременчук
Шефот на украинските железници изјави дека пет железнички станици во централна и западна Украина биле бомбардирани, што резултирало со голем број жртви.
Олександер Камишин, кој ја предводи државната железничка компанија на Украина, „Укрзализниција“, изјави за украинската телевизија дека нападите се случиле денеска на растојание од еден час, јави Би-би-си.
Едно од погодените места е Красне, источно од Лавов. Максим Козицки, шеф на регионот Лавов, објави на својот канал на Телеграм дека проектил погодил електрична трафостаница таму околу 08:30 часот по локално време.
„Сè уште нема информации за жртви. Службите за итна помош се на местото на настанот и работат на гаснење на пожарот“,
напиша тој.
На видео снимки кои се појавија на интернет, а кои не се потврдени од официјален извор, се гледа густ црн чад што се издига од локацијата.
Шефот на централниот регион Виница исто така објави на Телеграм дека таму има мртви и ранети, по бомбардирањата на станиците Жмеринка и Козјатин.
Серхиј Борзов не кажа колку жртви има, но рече дека Русите се обидувале да ја погодат „критичната инфраструктура“.
Украинските железници ги откажаа или пренасочија возовите по нападите.
Денешните напади следат по ракетниот напад на руските сили минатиот месец на железничка станица во источниот украински град Краматорск, во кој загинаа најмалку 50 луѓе – вклучително и деца – додека чекаа да бидат евакуирани во побезбедните делови на земјата.
Во меѓувреме, руското Министерство за одбрана соопшти дека со ракети со долг дострел се погодени украинската нафтена рафинерија и воени постројки Кременчук.
„Вооружените сили на Руската Федерација ја продолжуваат специјалната воена операција во Украина“,
соопшти Министерството.
Русија тврди дека ги погодила украинските воени инсталации и рафинеријата Кременчук во близина на реката Днепар, за кои гувернерот на регионот Полтава претходно овој месец објави дека е уништен.
„Ракети со голем дострел со голема прецизност уништија постројка за производство на гориво во нафтена рафинерија во северниот град Кременчук, како и инфраструктура за складирање гориво за воената опрема на украинската армија“,
се вели во руското соопштение.
Русија, исто така, тврди дека соборила два украински беспилотни летала во рускиот регион Курск, кој граничи со Украина, во понеделникот, изјави тамошниот гувернер Роман Старовоит.