Дел од српските медиуми синоќа објавија дека околу 19:45 часот се слушнало пукање во Зубин Поток, а до тоа дошло откако косовската полиција „сакала да отстрани една од барикадите“ во оваа општина на северот на Косово. Косовската полиција, пак, ги демантираше ваквите тврдења
Мисијата на НАТО во Косово, КФОР, за косовските медиуми соопшти дека се слушнале и видели истрели во близина на една од нејзините патроли во Зубин Поток, една од четирите општини населени со мнозинско српско население во северно Косово, јави регионалниот сервис на Радио Слободна Европа (РСЕ).
КФОР додаде дека нема ниту повредени ниту е причинета материјална штета и дека се работи на утврдување на фактите во врска со случајот.
Дел од српските медиуми синоќа објавија дека околу 19:45 часот се слушнало пукање во Зубин Поток, а до тоа дошло откако косовската полиција „сакала да отстрани една од барикадите“ во оваа општина на северот на Косово. Косовската полиција, пак, ги демантираше ваквите тврдења.
„Немаше напад врз косовската полиција, ниту размена на оган меѓу косовската полиција или некоја група, полицијата не разменила оган против никого“,
се вели во соопштението на косовската полиција.
Синоќа на социјалните мрежи се огласи и министерот за внатрешни работи на Косово, Џелал Свечла, кој објави оти „игрите на Вучиќ и неговите криминални инструменти продолжуваат“.
„Најпрво рекоа дека има судири во Зубин Поток иницирани од косовската полиција. Кога сфатија дека го нападнале КФОР, сакаа да ги негираат сите напади. Барикадите мора да се отстранат. Србија мора да престане да организира нелегални, криминални структури кои имаат за цел да го дестабилизираат Косово. Косовската полиција ќе продолжи да ја игра својата улога и да ја исполнува својата мисија“,
пишува Свечла на Фејсбук.
Началникот на Генералштабот на војската на Србија, Милан Мојсиловиќ, вечерта на 25 декември изјавил дека одржал средба со претседателот на Србија и со воениот врв и дека е на пат за Рашка на југот на Србија. Тој за телевизија Пинк изјавил дека ситуацијата на Косово е таква, што бара присуство на војската на Србија. Сепак, тој не кажал што се случило во Зубин Поток, откако дел од српските медиуми објавија дека на тоа место на северот на Косово се слушнале пукотници.