Најдобриот македонски атлетичар, Дарио Ивановски, патеката ја помина за 2:16:26 часа и заврши трет, додека македонска маратонка Адријана Поп Арсова заврши на втората позиција со истрчано време од 2:39:39 часа
Кенијците Хилари Чемвоно во машка и Ирине Џеруто во женска конкуренција победија на годинашниот 20. „Визер скопски маратон“.
Чемвоно патеката долга 42 километри ја истрча за 2:13:28 часа, додека Џеруто истата траса ја помина за 2:37:52 часа.
Во машка конкуренција на второ место заврши Кениецот Даниел Кипротич, а на третата позиција беше најдобриот македонски атлетичар, Дарио Ивановски, кој патеката ја помина за 2:16:26 часа.
Во женска конкуренција второто место ѝ припадна на најдобрата македонска маратонка Адријана Поп Арсова која трчаше 2:39:39 часа, а трета беше Кенијката Вивијан Џелагат.
Натпреварувачите од Турција оваа година беа најдобри на полумаратонската трка во машка конкуренција. Во оваа категорија прв на целта стигна Џан Хусеин кој патеката ја истрча за 1:05:54 часа, а зад него беа неговите сонародници Емектар Мурат на второто место и Гедиклиоглу Абдурахман на третата позиција.
Во полумаратонската трка најдобар македонски натпреварувач беше Иван Пешовски, кој заврши на шестата позиција со време од 1:12:58 часа.
Во женска конкуренција, на полумаратонската трка победи Милица Мирчева од Бугарија. Греша Бакрачи од Косово беше втора, а третата позиција ѝ припадна на Јулие Ларсен од Норвешка.
Најдобра македонска полумаратонка беше Миљана Ристиќ која заврши на четвртото место со истрчано време 1:22:55 часа.
На годинешниот јубилеен „Визер скопски маратон“ настапија рекордни 13 400 натпреварувачи од 55 земји.