Најголем дел од средствата, односно 3,75 милијарди денари, како што информираат од Министерството за финансии, ќе бидат насочени во програмата за мерки за справување со ковид-19 и други антикризни мерки, односно тие ќе бидат насочени кон ЕСМ за производство на електрична енергија од домашните капацитети
Пратениците на денешното продолжение на 88. пленарна седница изгласаа одлука за прераспределба на неискористените средства од државните институции, кои, според одлуката, ќе се пренаменат за други цели и за обезбедување дополнителни средства онаму каде што тоа е најпотребно.
Министерот за финансии Фатмир Бесими информира дека се работи за прераспределба на вкупно 5,15 милијарди денари.
„Овие средства се обезбедени по основ на заштеди на ставки што не се приоритетни и каде има помала реализација од планираната, како и од средства што не се реализирани во програми согласно механизмот КАПЕФ“,
вели Бесими.
Според одлуката, дел од средствата ќе бидат пренаменети за:
- Електрани на Северна Македонија (ЕСМ) во насока на домашното производство на енергија;
- надминување на последиците од енергетската криза;
- редовно финансирање на политичките партии;
- финансиска поддршка на „МЖ транспорт“;
- уредување на ТИР-зоните;
- мерки за контрола и искоренување на болеста африканска чума кај свињите;
- електрична енергија за хидросистемот на Дојранско Езеро;
- набавка на технологија за управување со отпад.
Со прераспределбата ќе се обезбедат и дополнителни средства за дотации од приходите од ДДВ за општините, односно дополнителни 0,5 отсто од наплатениот ДДВ во претходната година, распределен во два нови дополнителни дела – 0,25 отсто за дел за перформанси и 0,25 отсто за дел за воедначување, согласно последните измени на Законот за финансирање на единиците на локалната самоуправа.
Според одлуката, средствата за наведените намени се обезбедени по основ на заштеди од помалку реализираните расходи кај одредени буџетски корисници и дополнително обезбедени средства по основ на КАПЕФ-механизмот заради слабата реализација на капиталните расходи.
„Целта на прераспределбата е да се одговори на предизвиците од актуелната енергетска и ценовна криза. Затоа и најголемиот дел од прераспределните средства 3,75 милијарди денари се насочени во програмата за мерки за справување со ковид-19 и други антикризни мерки, односно тие ќе бидат насочени кон ЕСМ за производство на електрична енергија од домашните капацитети, со што се овозможува пониска цена за крајните потрошувачи на регулираниот пазар, односно домаќинствата и околу 70 илјади компании, како и средства за нови антикризни мерки“,
објансува министерот за финансии.
Од Финансии потсетуваат дека со ребалансот на Буџетот за 2022 година, беа обезбедени 4,7 милијарди денари за енергетската криза, а со оваа Одлука се обезбедуваат дополнителни 3,75 милијарди денари кои ќе се искористат за да се одговори на предизвиците од енергетската и ценовна криза, за да може да се излезе од кризата со најмалку последици.