Премиерот рече дека членот на обезбедувањето кој е приведен веројатно бил ангажиран кога се екипирал тимот по неговиот избор за премиер и додаде дека кој и да е, доколку ја изневери довербата на граѓаните, Владата и државата ќе биде најостро санкциониран
Дури и да се работи за најблиските луѓе околу мене, секое однесување за кое постои основано сомневање за сторено кривично дело и криминално однесување ќе се санкционира, изјави денеска премиерот Христијан Мицкоски по апсењето на членот на неговото обезбедување, за кого е отворена и истрага од страна на Основното јавно обвинителство за гонење на организиран криминал и корупција (ОЈО ГОКК).
Ова, вели Мицкоски, никогаш не било случај во минатото.
„Се сеќаваме на многу такви јунаци кои беа во близина на претседателите на Владата коишто палеа и жареа низ Македонија, кои беа страв и трепет, јавна тајна беше дека тие се оние коишто во сенка ги вршеа валканите работи за тогашните претседатели на Владата, не треба да ги споменувам имињата, јавноста ги знае“,
изјави Мицкоски одговарајќи на новинарски прашања.
Премиерот рече дека членот на обезбедувањето кој е приведен најверојатно бил ангажиран кога се екипирал тимот по неговиот избор за претседател на Владата и додаде дека кој и да е, доколку ја изневери довербата на граѓаните, Владата и државата ќе биде најостро санкциониран.
„Јас во една пригода кажав – и брат и сестра да ми е и свети ВМРО да е, доколку ја изневери довербата на граѓаните, ја начне честа и на ВМРО-ДПМНЕ, политичката партија од која доаѓам јас, а пред сè на Владата и државата ќе биде најжестоко и најостро санкциониран, кој и да е“,
додаде Мицкоски.
Изјавата на премиерот следува откако пред неколку дена беше уапсен полицискиот службеник и член на неговото обезбедување поради сомневања дека издавал службени тајни на трети лица. Станува збор за Ангел Сарамаков од Велес, кому му е одреден 30-дневен притвор и против кого ОЈО ГОКК отвори истрага.