„Дали однесувањето на сите министри во Владата и на сите функционери беше соодветно. Не. Имаше дел од функционерите кои не се однесуваа соодветно на политичките прилики и на политичкиот амбиент кој го имаме тука. Можеби во Америка и во Канада тоа е прифатливо, но тука на граѓаните не им прифатливо“, вели претседателот на СДСМ
Она што го гледам кај граѓаните е замореност од процесот на европска интеграција. Понекогаш и јас го чувствувам тој замор. Македонија требала да донесе најтешки и најмногу одлуки во делот на пристапување во Европската Унија. Но, постои огромен број на граѓани кои сакаат да бидат дел од Европската Унија. Процесот на интегрирање во Европската Унија е единствен процес кој може да донесе врвни позитивни промени во нашето општество, како подобар економски стандард, повисоки плати и пензии, подобро образование и здравство. Ова денеска го изјави претседателот на СДСМ, Димитар Ковачевски одговарајќи на прашањето како го толкува ставот на американската амбасадорка Анџела Агелер дека земјата страда од пандемија наречена корупција, псоочувајќи дека важно е дали се има план тоа да се смени.
„Се согласувам и со американската амбасадорка и со британскиот амбасадор и со холандскиот и со амбасадорот на Европската Унија. Програмата на СДСМ содржи 41 мерка за реформа на правосудниот систем. Тие ќе бидат јавно објавени, а се правени заедно со Европската Унија, на мое барање од оценската мисија на Европската Унија. во поглед на борбата со корупцијата веќе покажавме дека можеме да се подобриме. Но, секогаш може да биде подобро“,
рече тој.
Според него, подготвиле како влада закон за санкции, кој неговата Влада го поднела во Собранието.
„Техничката влада го повлече. И на крај претседателот на Комисијата за надворешни работи го сокри во фиока и никогаш не го стави на гласање. Процесот на донесување на овој закон го блокираат другите политички партии. Јас како политичар по добивањето на мандатот ќе работам ден и ноќ сите овие проблеми кои ги мачат граѓаните да ги отстраниме и во делот на владеење на правото и во корупцијата“,
вели претседателот на СДСМ.
На прашањето дека голем дел од коруптивните скандали биле на страната на ДИУ и дали повторно би коалицирале со нив, Ковачевски рече дека ДУИ беше во коалиција 11 години со ВМРО-ДПМНЕ, кога како што посочи, имало заробена држава.
„Најпознат остана процесот на антиквизација. Подоцна ДУИ беше во коалиција со СДСМ, заедно донесовме одлука Македонија да стане членка на НАТО и да започне преговори со ЕУ. Нешто што не беше направено во изминатите 31 година. Дали однесувањето на сите министри во Владата и на сите функционери беше соодветно. Не. Имаше дел од функционерите кои не се однесуваа соодветно на политичките прилики и на политичкиот амбиент кој го имаме тука. Можеби во Америка и во Канада тоа е прифатливо, но тука на граѓаните не им прифатливо“,
рече Ковачевски.
Министрите од ДУИ работеле напорно со него во економските ресори, како што вели Ковачевски, а тоа е за пофалба, оти работеле во услови на голема енергетска криза.
„Можам да кажам само пофални зборови за Битиќи, кој е од мојата партија. Не можете сите Албанци да ги препишувате дека се на ДУИ. Бесими, Крешник работеа напорно, како и Азир Алиу од Алијанса за Албанците. Она што ќе биде различно во следниот мандат е поголема дисциплина. Заради менаџирање на кризата не можев да бидам посветен на персоналното однесување на секого во Владата. Но, еден од приоритетите при правењето на новата Влада ќе биде внимателен пристап кон селекција и кон именувањето на човечките ресурси кои ќе управуваат со секој ресор на различните нивоа на управувањето со државата“,
рече Ковачевски.