Јанакиески од вчера има правосилна пресуда според која треба да одлежи три и пол години затвор, но веќе има одлежано околу четири и пол години притвори за разни предмети
Поранешниот министер за транспорт и врски Миле Јанакиески денеска повторно е во скопскиот Кривичниот суд во Скопје за еден од предметите во кои му се суди, еден ден откако беше објавена правосилноста на пресудата за случајот „Титаник“. А во „Титаник“, предмет за дела против изборите и гласањето, Јанакиески призна вина и доби три и пол години затвор.
Иако против Јанакиески има повеќе предмети, а некои се во суд веќе шеста година, „Титаник“ е првиот предмет за кој има правосилна пресуда против Јанакиески. А правосилна пресуда значи дека следува отслужување на казната затвор.
Затворот да се „пребие“ со притворот
Домашната легислатива е јасна. Кога некој ќе биде правосилно осуден на издржување казна затвор, во казната се засметува и евентуалниот притвор, односно лежењето во затвор се намалува за времето поминато во притвор во претходните фази во постапката. „Проблемот“ кај Јанакиески, ако може така да се каже, е што тој помина многу долго време во притвор, но за повеќе различни предмети.
Денеска неговиот адвокат Еленко Миланов поднесе барање до Кривичниот суд во Скопје со кое бара – притворите од разни предмети кои ги одлежал Јанакиески да се соберат и да му се одземат од казната за „Титаник“.
„Законски пречки за такво спојување нема. Дури и законските одредби укажуваат на тоа дека без оглед за кое кривично дело, доколку има лишување од слобода за кое било кривично дело, судот треба да ги засмета. Никаде не е определено дека судот, ниту дека по разни предмети може да се спојат (притворите н.з.), но исто така никаде не е забрането тоа да се чини“,
изјави денеска пред Кривичниот суд во Скопје адвокатот Еленко Миланов.
Ако Кривичниот суд го одбори ваквото барање, тоа секако ќе биде прво, барем кога е во прашање осуденик од висок профил како што е Миле Јанакиески. И не само тоа, ако судот се согласи да му ги спои притворите, ќе треба и да се согласи да „пребие“ само дел од нив со затворската казна за „Титаник“, а дел да остави „фазла“ бидејќи поранешниот министер има поминато повеќе време во притвор отколку што досега му е досуден затвор.
„Ако досега има издржано четири години и шест месеци, што е до овој момент една година повеќе од она што е актуелно правосилна казна, со вчера објавената пресуда, која ја имаме видено само на порталот, сметам дека има можност и основа да бидат засметани дел од овие четири години и шест месеци.
изјави Миланов.