Знаете дека постапките по вакви барања се од доверлив карактер, но јас би барала јавност на постапката со цел пошироката јавност да биде информирана – одговори претседателката на Врховен суд на прашање на „360 степени“
Со мошне кус одговор, претседателката на Врховниот суд, Беса Адеми, денеска одговори на прашањата на „360 степени“ за тоа дали продолжуваат политичките притисоци врз судиите на највисокиот суд во земјава за кои самата јавно посведочи и како го коментира фактот што никој не демантира дека во Судскиот совет постои иницијатива за нејзино разрешување.
„Мојата работа и работата на Врховниот суд се позитивно оценети во извештаите на Европската Унија. Евентуално такво барање мора да ги предвиди и овие факти и аргументи. Знаете дека постапките по вакви барања се од доверлив карактер, но јас би барала јавност на постапката со цел пошироката јавност да биде информирана”,
кажа таа.
Адеми денеска беше учесничка на конференција „Транспарентност и отчетност: Совршен пар за враќање на довербата во јавните институции“, организирана од Институтот за комуникациски студии (ИКС).
Во своето воведно обраќање на конференцијата, судијката, меѓу другото, повтори дека не смее да има влијание врз судиите.
„Во Кодексот на етика на судиите којшто е донесен од Врховниот суд на Република Северна Македонија се пропишува дека судијата во своето однесување, како во Судот, така и надвор од Судот, придонесува за одржување, односно подобрување на довербата кон јавноста. Судијата не смее да биде под влијание на извршната и законодавната власт и во секоја пригода ја брани независноста на судот од политички притисоци и влијанија. Секој судија треба да ја поддржува и да дава пример за судиската независност. Интегритетот е атрибут на чесност и праведност“,
кажа меѓу другото таа и, повикувајќи се на меѓународни документи, посочи дека јавната доверба треба постојано да биде негувана.
Медиумска кампања
Судијката Беса Адеми безмалку три години е на чело на Врховниот суд. Таа има 12-годишен стаж во Судот, а на конкурсот за избор на претседател победи во конкуренција на Лидија Неделкова и Џемали Саити, кои иако беа поекспонирани во јавноста, имаат малку покус стаж во највисокиот суд.
При давањето на свечената заклетва во Судскиот совет, во март 2021 г., таа кажа дека ќе се посвети на максимално извршување на функцијата како и дека заедно со нејзините колеги ќе се обидат да ја врати довербата на граѓаните во судскиот систем.
Во октомври годинава и беше домаќинка на амбасадорката на САД, Анџела Агелер, по што Врховниот суд со соопштение од средбата порача дека судството не смее да биде под притисок на политиката.
Медиумите објавија оти „средбата била по барање на судии кои биле под жесток притисок од владата и барале заштита од политички реваншизам“. Потоа, амбасадорката Агелер во изјава за ТВ Сител кажа дека мешањето на приватни лица или јавни функционери во судските процеси не смее да се толерира.
Лично претседателката на Врховниот суд, Беса Адеми, во интервју за порталот „Сакам да кажам“, посочи дека постојат ситуации на мешање на политиката во судството, но нема основа за „оживување“ на аболициите на Иванов.
Прашана како изгледаат притисоците врз судството, таа вели дека секогаш е присутна заканата дека може да се разрешуваат судиите на Врховниот суд и за таа цел да се користат дури и лажни вести.
Истражувачкиот портал „Призма“, кој го издава БИРН, минатиот месец објави дека преку идентични текстови што синхронизирано и спонзорирано се објавуваа на два релативно непознати портали – redakcija.mk и desk.mk, се води црна кампања против претседателката на Врховен суд, Беса Адеми. Истражувајќи, БИРН ги доведе сајтовите во врска со функционерот од ДУИ и директор на Државна лотарија, Перпарим Бајрами, кој се смета за близок до првиот вицепремиер Артан Груби.
Паралелно, Судски совет закажа работна средба со претседателката Адеми, поради нејзините наводи во медиумите за политички притисоци врз судиите во Врховниот суд. Преку писмо испратено до јавноста, таа одговори дека нема да оди на средба поради претходно закажан настан и поради тоа што и претходно имало јавни изјави за притисоци врз судии, а Советот не презел ништо.
Претседателот на Судскиот совет, Сашко Георгиев, во гостување во емисијата „360 степени”, не демантираше дека има иницијатива за разрешување на Беса Арифи. Рече дека тие постапки се од доверлив карактер.
Во однос на притисоците врз судии, премиерот Димитар Ковачевски кажа дека судиите треба да кажат од кого имаат притисок, како и дека одговорноста има име и презиме.