Основното јавно обвинителство во Битола поднесе предлог за издавање казнен налог за пет лица, членови на семејство кои се вратиле од Италија, а не останале во задолжителна домашна изолација.
Иако им било наложено да останат во самоизолација 14 дена, членовите на семејството биле затекнати на улица, каде што физички се пресметале со соседите.
„Тие биле должни согласно издадените решенија од надлежните органи во периодот од 14.03.2020 година до 27.03.2020 година да бидат во домашна изолација и да не го напуштаат своето престојувалиште во Битола. На 18.03.2020 година, околу 12.00 часот, излегле од својот дом на улицата пред семејната куќа, вербално се расправале со соседите, по што двајца од обвинетите физички ги нападнале соседите и им нанеле телесни повреди. Со овие дејствија сите обвинети не постапиле по донесените прописи за време на пандемија – епидемија од глобални размери со кои се определуваат мерки за сузбивање или спречување на епидемијата на заразната болест предизвикана од коронавирус – ковид-19“,
стои во соопштението на обвинителството.
Лицата се обвинети дека сториле кривично дело – непостапување според здравствените прописи за време на епидемија од член 206 став 1 од Кривичниот законик.
По предлог на Обвинителството, Основниот суд Битола предложи на обвинетите да им изрече 100 дневни глоби, при што вредноста на една една дневна глоба да се определи во висина од по 20 евра во денарска противвредност, односно вкупно 2 000 евра.