Како што информира државното Јавно обвинителство, иако бил свесен дека во куќата живеат четири семејства и постојано има голема фреквенција на луѓе, како и дека поради таквото негово дејствие може да настапи последица, тој сепак лекомислено сметал дека штетната последица може да ја спречи или дека таа нема да настапи, па на тој начин предизвикал значителна опасност за животот и телата на луѓето. Мамките со отров ги развлекло и ги јадело куче без сопственик, кое починало од труење
Против 32-годишен жител на кавадаречкото село Глишиќ, од страна на Основното јавно обвинителство Кавадарци е поднесен предлог за издавање на казнен налог, поради обвинение за кривични дела, како Предизвикување општа опасност од член 288, став 4 во врска со став 1, и Мачење животни според член 233, став 1 од Кривичниот законик.
Како што информира државното Јавно обвинителство, обвинетиот на 9 ноември исекол неколку парчиња салама, ги напрскал со токсичен препарат наменет за прскање и заштита на винова лоза, ги ставил во кеси како мамец и ги оставил пред незаградениот двор на семејна куќа.
„Иако бил свесен дека во куќата живеат четири семејства и постојано има голема фреквенција на луѓе, како и дека поради таквото негово дејствие може да настапи штетна последица, тој сепак лекомислено сметал дека штетната последица може да ја спречи или дека таа нема да настапи, па на тој начин предизвикал значителна опасност за животот и телото на луѓето. Мамките со отров ги развлекло и ги јадело куче без сопственик, кое се отруло и починало“,
соопшти ЈОРСМ.
Оттаму наведуваат дека поради сите околности, вклучително и тоа што обвинетиот претходно не е осудуван и фактот дека го признал делото пред јавниот обвинител и изразил каење, до Основниот суд во Кавадарци е доставен предлог да се изрече алтернативна мерка – условна осуда со утврдена затворска казна која нема да се изврши доколку обвинетиот во дадениот временски рок не стори ново кривично дело.
Исто така, до судот е предложено тој и парично да се казни со 30-дневни глоби со поединечна вредност на дневната глоба од 10 евра во денарска противвредност.