Лидерот на Беса најави и широк опозициски фронт пред избори велејќи дека со влегувањето на Алијанса за Албанците (АА) во владината коалиција, се отворил теренот за опозицијата, односно дека сите албански гласачи со опозициско убедување сега ќе се приближат до Беса
Според лидерот Беса и актуелен градоначалник на Тетово, Билал Касами, уставните измени може да се направат уште оваа година, но вели дека Владата треба да прифати оти со ваквата политика не може да се постигне мнозинството кое е потребно за усвојување на измените.
„Верувам дека уставните измени ќе се направат годинава. Која влада ќе ги направи овие измени, тоа е друга тема. Можни се предвремени избори. Владата треба да прифати дека со оваа политика не може да се постигне мнозинство. Ако оваа влада е заинтересирана да ги направи уставните измени и да го продолжи патот кон ЕУ, мислам дека со договор на лидерите може да се обезбеди мнозинство за уставните измени“,
рече Касами во синоќешното гостување во дебатниот магазин „Клик плус“ на ТВ 21.
Касами додаде дека Беса нема проблем со внесувањето на Бугарите и другите народи во преамбулата на Уставот, но нагласи дека партијата би го поддржала тоа доколку во Уставот формулацијата „јазик кој го зборуваат 20 проценти од граѓаните“ се замени со „албански јазик“.
Касами најави и широк опозициски фронт пред избори велејќи дека со влегувањето на Алијанса за Албанците (АА) во владината коалиција, се отворил теренот за опозицијата, односно дека сите албански гласачи со опозициско убедување сега ќе се приближат до Беса.
„Освен тоа, големо е незадоволството и кај гласачите на ДУИ. Но, не само тоа. И другите етнички заедници се целосно незадоволни од оваа влада. Ние сакаме да им отвориме врата и на другите етнички заедници, на пример на Турците, Ромите, Бошњаците“,
вели Касами.
Лидерот на Беса најави и можна соработка со т.н. „огнена група“, која од неодамна официјално дејствува како фракција во Демократската унија за интеграција (ДУИ), но за тоа да се случи, Касами вели дека тие треба целосно да се отцепат од ДУИ.