Во тек е пресметката за вредноста на мерките, при што некои ќе бидат опфатени со закон
Ваучери и картички за најсиромашните и таргетирана финансиска поддршка на најпогодените компании од ковид – кризата, тоа ќе биде суштината на новите антикризни мерки, што ќе бидат објавени следната недела.
Во тек е пресметката за вредноста на мерките, при што некои ќе бидат опфатени со закон.
Ова го најави премиерот Зоран Заев, појаснувајќи дека приватната потрошувачка ќе биде поддржана со нови картички и ваучери кои ќе бидат наменети за социјално погодени граѓани – пасивните баратели на работа, пензионерите со пензии под 15 илјади денари, самохраните родители, стечајните работници кои земаат надомест, како и ранливите категории сиромашни граѓани преку центрите за социјални работи.
За стопанството, ќе се продолжи со оние мерки што според анализите дале резултати, додека специјална нова мерка ќе се однесува на враќање на отпуштените работници.
Една од мерките која ќе продолжи и натаму е онаа за субвенционирање на исплата на плата од 14 500 денари, но таа ќе се доделува во зависност од тоа колку се погодени фирмите од кризата.
„Најверојатно ќе тргнеме од некоја помош од 14 500 денари, која дополнително ќе важи за тие што се погодени од кризата околу 30 отсто, која ќе биде поголема за тие што се погодени 40 отсто, па 50 отсто, 60 отсто, за да имаме правичност во реализацијата. Мерките ќе се однесуваат на парафискалните давачки, одложувањето на одредени даноци, како даночната аконтација на данокот на добивка и одредени други важни даноци“,
изјави вчера премиерот Заев.
Ќе се олеснува тековната активност на компаниите, ќе се поттикнуваат инвестициите
Министерот за финансии Фатмир Бесими, пак, ја најави државната гарантна шема, која треба да започне да профункционира до крајот на годината и ќе се одвива преку Развојната банка, за што се потребни законски измени.
Оваа мерка треба да ја подобри ликвидноста на компаниите, да ја олесни тековната работа на компаниите и да ја поттикне инвестициската активност.
Меѓу останатите мерки е и државата да го покрива даночниот дел од трошоците за ковид-тестови, а прифатливо е и нивното барање за двојното одданочување за здравственото осигурување.
Вицепремиерот за економски прашања, Фатмир Битиќи, минатата недела најави дека новите антикризни мерки ќе опфата повеќе категории граѓани, пакетот ќе би е многу поголем и ќе се обезбеди од ребалансот на Буџетот.
Според податоците од Министерството за економија, што ги прементира министерот Крешни Бектеши минатата недела, од вкупно 500 милиони евра предвидени за поддршка на економијата, досега се реализирани околу 140 милиони евра, од кои приближно 40 милиони евра се исплатени за граѓаните, а 100 милиони евра како финансиска поддршка за фирмите.