Родово базираното насилство е пандемија во време на пандемијата со ковид-19, а предизвикот за да се стави крај на тоа е уште поголем во овие услови, смета извршната директорка на извршната директорка на Фондот за население на Обединетите нации – УНФПА, д-р Наталија Канем.
Таа по повод Светскиот ден на населението во своето обраќање до јавноста вели дека во текот на животот, една од три жени е жртва на физичко или сексуално насилство. Во моментов, како резултат на мерките за карантин и зголемените тензии во домаќинствата, се зголемува и родово базираното насилство, додека, пак, пристапот до здравствените услуги за сексуално и репродуктивно здравје е отежнат поради тоа што здравствените системи се борат да се справат со вирусот ковид-19.
„Влијанието на ковид-19, најверојатно, ќе ги отежне глобалните напори за постигнување на трите ‘нули’ до 2030 година преку нашата работа во УНФПА – нула неисполнета потреба за планирање на семејството, нула превентивна смрт на мајките и нула родово базирано насилство и штетни практики против жените и девојките. На пример, УНФПА предвидува дека пандемијата ќе го намали глобалниот напредок кон ставање крај на родово базираното насилство во оваа деценија за најмалку една третина“,
вели Канем.
Покрај тоа, доколку ограничувањата на движењето продолжат за уште најмалку шест месеци, ќе придонесат за големи нарушувања во однос на пристапот до здравствени услуги, односно 47 милиони жени во земјите со ниски и средни приходи може да бидат лишени од пристапот до модерни контрацептивни средства, што резултира со несакана бременост кај седум милиони жени.
„На Светскиот ден на населението нашето внимание е свртено кон ранливоста и потребите на жените и девојките за време на кризата со ковид-19, како и зошто заштитата на сексуалното и репродуктивно здравје и права и ставањето крај на пандемијата со родово базирано насилство е императив, особено во овој период кога се соочуваме со ковид-19“,
вели Канем.
УНФПА работи на соодветно снабдување со современи контрацептивни средства и производи за репродуктивно здравје, како и обезбедување соодветна лична заштитна опрема за акушерките и другите здравствени работници на коишто им е потребна за да останат безбедни.
„Ние сме охрабрени што досега 146 земји членки се пријавиле на повикот на генералниот секретар да го остварат мирот во домот, на коишто целосно им се приклучуваме со цел да ги поддржиме. Како дел од нашето справување со ковид-19, ние воведуваме иновации за да испорачаме далечински услуги, како што се телефонски линии, телемедицина и соодветно советување, како и користење и прибирање распределени податоци со цел поддршка на владите во врска со идентификување на оние на кои им е најпотребна“,
додаваа таа.