Гласачките места се отворени од 8 часот, кандидатите очекуваат фер и демократски изборен процес до крајот на денот, но има информации и дека на дел од членството не му било дозволено да гласа
Процесот на гласање на внатрепартиските избори за претседател на СДСМ, според информациите насекаде низ државата, се одвива мирно, има позитивен дух меѓу сите другари и другарки кои излегуваат на гласање, изјави кандидатот за нов лидер на партијата Венко Филипче по гласањето на своето избирачко место во Општина Карпош. Филипче ги повика сите регистрирани членови да излезат да гласаат во што поголем број.
„За спроведување на постапката одговорна е Централната изборна комисија која сите тие забелешки ги анализираше и не извести сите кандидати дека сите тие сомнежи се неосновани и дека целокупниот процес е легитимен,“
рече Филипче.
Фото: МИА
Деспотовски, кој исто така претендира да биде прв човек на СДСМ, нагласи дека има информации за голем број членови на партијата на кои им било оневозможено да гласаат. СДСМ, како што рече, е политичка партија која во ниту еден момент не смее да си дозволи своите членови да ги враќа од избирачките места.
„Со мојот тим изминатите неколку денови зборувавме на оваа тема, поднесовме и официјално барање да им се овозможи на сите оние членови на партијата кои ќе се појават на избирачките места, да можат да си го реализираат своето уставно загарантирано право. Сите овие случаи се евидентираат секаде, имаме контрола на секое избирачко место низ државата во сите општински организации. Без разлика на исходот од гласањето, ќе мора во наредните неколку денови да се посветиме како политичка партија сите овие случаи да ги расчистиме,“
посочи Деспотовски.
Фото: МИА
И Бајдевски во својство на кандидат за претседател го искористи гласачкото право и порача дека ќе поднесе претставки поради злоупотреба на податоците.
„Јас реагирав на изјавата на другарката Славјанка Петровска, сметам дека има таму сериозни обвинувања, јас и јавно го повикав и генералниот секретар и изборната комисија да се изјаснат, досега тоа не беше случај. Се надевам дека во наредниот период нема да застане тука работата. Ние имаме органи на партијата, треба да се поднесат соодветни претставки и јас тоа ќе го сторам особено во однос на базата и злоупотребата на податоците на нашите членови“,
рече Бајдевски.
Фото: СДСМ
Гласањето се спроведува во 77 избирачки места низ државата, а на списокот се акредитирани 23 373 члена на СДСМ.
Актуелната пратеничка и поранешна министерка за одбрана Славјанка Петровска вчера соопшти дека ја повлекла кандидатурата, а во во писмото до Централната изборна комисија за претседателските избори во партијата наведува дека сака да го заштити СДСМ од нелегитимен избор на претседател како и да избегне да биде соучесник во погазување на Статутот. Таа претходно побара и откажување на изборот за претседател, закажан за 30 јуни.
Изборот за нов лидер на СДСМ следува откако Димитар Ковачевски се повлече од лидерската позиција на партијата по поразот на двојните избори кои се одржаа во мај.