Новиот лидер на Либералната партија, кој на 14 март ја презеде премиерската функција од Џастин Трудо, побара силен мандат од Канаѓаните за да се обезбеди иднината на земјата
Премиерот на Канада, Марк Карни, денеска распиша предвремени парламентарни избори за 28 април.
На конференција за медиумите, на која го соопшти датумот за изборите, Карни нагласи дека Канада мора да се брани од засилениот економски притисок од Америка.
„Знаеме дека мораме да дејствуваме за да им се спротивставиме на Американците, да се справиме со царините на Трамп и да ја поправиме канадската економија“,
рече Карни.
Новиот лидер на Либералната партија, кој на 14 март ја презеде премиерската функција од Џастин Трудо, ја нарече трговската војна со САД една од најголемите закани за Канада и предупреди на постапките на Доналд Трамп.
„Тој сака да ја скрши Канада за да може Америка да нè поседува. Нема да му дозволиме да го направи тоа“,
порача канадскиот премиер.
Воедно, Карни побара силен мандат од Канаѓаните за да се обезбеди иднината на земјата.
Главен противкандидат на либералите ќе им биде Конзервативната партија на Пјер Поиливр.
И двајцата кандидати за премиер се обидуваат да го убедат електоратот дека ќе му се спротивстават на американскиот претседател Доналд Трамп.
Поранешниот премиер Џастин Трудо поднесе оставка во јануари откако неговата Либерална партија доживеа пад на поддршката поради слабата економија.