Според мексиканскиот Кабинет за безбедност, меѓу повредените има туристи од Колумбија, Канада, Русија, Бразил и Соединетите Американски Држави (САД), од кои седум биле застрелани, додека другите се здобиле со повреди при пад
Државјанка на Канада е убиена, додека најмалку 13 други странски посетители се ранети и повредени откако вооружен маж вчера отворил оган на археолошкото наоѓалиште Теотихуакан во Мексико, пренесоа светските агенции, повикувајќи се на извештаи на локалните власти.
Пукањето во една од најпосетуваните туристички атракции во Мексико, која се наоѓа на околу еден час возење со автомобил до главниот град на земјата, се случува на само неколку недели пред почетокот на Светското првенство во фудбал, чиј кодомаќин е Мексико, заедно со Соединетите Американски Држави (САД) и Канада.
Според мексиканските безбедносни власти, вооружениот маж отворил оган од засега непознати причини, пред да си го одземе животот по крвавиот пир.
Во врска со вооружениот инцидент на социјалните мрежи се огласи претседателката на Мексико, Клаудија Шајнбаум, која изрази солидарност со жртвите и сочувство со нивните семејства.
„Она што денеска се случи во Теотихуакан длабоко нè боли. Ја изразувам мојата најискрена солидарност со засегнатите лица и нивните семејства“,
напиша Шајнбаум на платформата Икс, додавајќи дека надлежните власти во земјата се во контакт со канадската амбасада.
Дополнително, претседателката на Мексико соопшти дека му наложила на Кабинетот за безбедност темелно да ги истражи околностите во кои се случил нападот и да ја обезбеди целата потребна поддршка.
„Персонал од Секретаријатот за внатрешни работи и култура веќе се упатува кон местото на настанот за да обезбеди помош заедно со локалните власти. Внимателно ја следам ситуацијата и ќе продолжиме да даваме навремени информации преку Кабинетот за безбедност“,
наведува Шајнбаум во објавата.
Lo ocurrido hoy en Teotihuacán nos duele profundamente. Expreso mi más sincera solidaridad con las personas afectadas y sus familias. Estamos en contacto con la embajada de Canadá.
— Claudia Sheinbaum Pardo (@Claudiashein) April 20, 2026
He instruido al Gabinete de Seguridad a investigar a fondo estos hechos y brindar todos los… https://t.co/ceBDNjKxDv
Според мексиканскиот Кабинет за безбедност, меѓу повредените има туристи од Колумбија, Канада, Русија, Бразил и Соединетите Американски Држави (САД), од кои седум биле застрелани, додека другите се здобиле со повреди при пад.
Извештаите велат дека меѓу повредените од огнено оружје се и едно дете од Колумбија, како и тринаесетгодишник од Бразил.
„Станува збор за многу тешка ситуација. Мислам дека ова место, како една од најпосетуваните области во Мексико, ќе биде директно засегнато, како во однос на туризмот, така и во однос на економијата на општините што живеат од него. Се надеваме дека луѓето ширум светот ќе ја разберат ситуацијата. Ова не е нешто што се случува често. Ќе работиме на обезбедување на местото, не само ние како водичи, туку и сите институции на државно, општинско и, секако, федерално ниво“,
изјавила Грасиела Дарио, туристички водич од археолошкиот локалитет Теотихуакан.
Инаку, Теотихуакан е едно од најважните археолошки локалитети во Мексико, каде што се наоѓаат „Пирамидата на Сонцето“, „Пирамидата на Месечината“ и „Храмот на пердувестата змија“.
На платформата Икс е објавено вознемирувачко видео на кое се гледа како напаѓачот пука кон посетителите од „Пирамидата на Месечината“.
Според медиумите, вооружени инциденти, налик на вчерашниот, се невообичаени за мирниот антички локалитет, кој се случува во пресрет на Светското првенство во фудбал, кое Мексико, Канада и САД заеднички го организираат во јуни и јули.
На својот културен и цивилизациски врв во 5. и 6. век, Теотихуакан бил најважната метропола на Мезоамерика, област што се протега од денешно централно Мексико до североисточна Костарика и е дом на низа меѓусебно поврзани, напредни култури и цивилизации што светале 3 000 години пред откривањето на Америка.
Локацијата Теотихуакан во 1987 година доби статус на заштитено светско наследство на УНЕСКО.