Министерот за економија Крешник Бектеши посочи оти уделот на увоз на нафтени деривати во земјава со потекло од Русија е приближно осум отсто и додаде оти каква одлука и да се донесе од страна на Русија во врска со снабдувањето со природен гас во земјава, кај нас влијанието ќе биде многу мало, минимално
Прекинот на испорака на гас од Русија кон Бугарија не е поврзан со Северна Македонија, што значи дека денеска имаме континуирана испорака на гас од „Газпром“ преку гасоводот од Бугарија, изјави министерот за економија Крешник Бектеши на денешната прес-конференција додавајќи оти од наша страна се подмирени сите обврски во делот на снабдување со природен гас.
Но, освен што испораката не е прекината, предупреди Бектеши, ситуацијата е комплексна и никогаш не се знае какви одлуки може да се донесат во наредните денови.
„Ние како институции и како држава сме подготвени и имаме соодветни алтернативи за секаква одлука која би можела да се донесе. Каква и одлука да се донесе, кај нас влијанието ќе биде многу мало, минимално, да не кажам нула“
посочи министерот и додаде оти ако испораката на гас од „Газпром“ во земјава престане, индустриските капацитети како замена може да користат мазут.
Во однос на тоа оти рускиот гигант „Газпром“ го суспендира снабдувањето со гас во Бугарија, Бектеши посочи дека Бугарија не смее да направи прекин во транспортот на природен гас кон земјава и оти преносната мрежа мора да функционира.
„Не смее тоа да го направи согласно договорот и потребата на цевководот. Имаме количества кои се одредени за потребите на земјава и преносната мрежа мора да функционира. Тоа значи дека ако Руската Федерација не донесе одлука за прекин на испорака на природен гас во Северна Македонија, испораката треба да се одвива во континуитет и редовно. Прекуграничните количества во интерконекторот со Бугарија се резервирани до 2030 година од страна на „Газпром“. Дополнително во случај да се раскине договорот меѓу „Бугартрансгаз“ и „Газпром“ во делот на прекуграничните количества кои се резервирани во нашиот интерконектор и во другите интерконектори во Република Бугарија тогаш слободно можеме да увеземе природен гас и преку интерконекторот што го има Република Бугарија со Република Грција, кој е поврзан на гасоводот ТАБ и обезбедува гас од Азербејџан“,
рече Бектеши во одговор на новинарско прашање.
Меѓу другото, министерот посочи дека дека во тек е проектот за гасна интерконекција со Грција, кој како што истакна, може да стане оперативен многу брзо, а со кој се очекува да се создадат услови за целосна диверзификација во снабдувањето со природен гас.
„Генерално, уделот на увозот на нафтени деривати со потекло од Русија е приближно осум отсто во нашата држава, а со тоа и уделот во снабдување со нафтени деривати на пазарот на нафтени деривати кој е целосно либерализиран во Северна Македонија“,
додаде Бектеши.
Министерот посочи оти следната недела во Софија ќе се состанат министрите од регионот, со цел, како што рече, да се презентираат сите потреби на нашите држави, а со тоа да имаме континуитет во снабдувањето и со природен гас и со други енергенси во Западен Балкан, првенствено во Северна Македонија.