Министерот за правда Никола Тупанчески, пак, денеска изјави дека според три законски акти од Законот за правосуден испит донесен во 2013 година, министерот имал дискреционо право да дозволи предвремено полагање на правосудниот испит. Некој, како што рече, дефинитивно го искористил тоа овластување и од тие причини законот е сменет за таква можност да не постои во иднина
Во 2013 година важел еден закон, сега има нов закон којшто, очигледно, воведува нова одредба, нов став кој вели дека предвременото полагање на правосуден испит е забрането, вели адвокатот Дељо Кадиев во вечерашната дебата во „Топ тема“ на Телма ТВ коментирајќи на темата за предвремено полагање на правосуден испит која се актуелизираше откако се објави дека правосудниот испит предвреме го полагал и синот на собранискиот спикер Талат Џафери.
„Меѓутоа, ако го гледате стариот закон, никаде не пишува дека е дозволено. И јас не можам да се сложам дека во законот од 2013 година, министерот имал дискреционо право да дозволи предвремено полагање. Тоа никаде во законот го нема. Останува да се замислиме како е дојдено до полагање, доколку е предвремено, а очигледно е предвремено од она што го слушаме во изјавите на сите чинители“,
потенцира Кадиев.
Министерот за правда Никола Тупанчески, пак, денеска изјави дека според три законски акти од Законот за правосуден испит донесен во 2013 година, министерот имал дискреционо право да дозволи предвремено полагање на правосудниот испит. Некој, како што рече, дефинитивно го искористил тоа овластување и од тие причини законот е сменет за таква можност да не постои во иднина.
Адвокат Кадиев во гостувањето на ТВ Телма ја нагласи и „наводната техничка грешка“, верзија што се провлекува во јавноста, во што тој не верува.
„Намерно ја потенцирам ‘наводна техничка грешка’, бидејќи не може некого да измешате по некој стар систем којшто имаше диплома 7/1, 7/2, магистерски 7/3, докторски студии и Болоњскиот систем кој што воведува ЕКТС кредити. Законот е јасен и во едниот и во другиот случај. Не можете да ги помешате тие два случаја. Законот за високо образование вели ‘да, ќе биде дипломиран’ и би се стекнал со звање дипломиран правник и со 180 ЕКТС, меѓутоа не може никако да ставите дека имал 7/1 ако студирал по Болоњски систем“,
вели Кадиев.
Кадиев изрази загриженост и околу неможноста да се направат соодветните проверки по однос на предвреме полаганите правосудни испити од страна на институциите, оти тогашниот функционер издал наредба за чување на материјалот само една година.
„Јас го отворив и законот за архивско работење и такви рокови за чување на материјал не постојат. Еве, и ние адвокатите кои работиме и како агенти за регистрација, мораме да чуваме најмалку пет години, па да предадеме документација од регистрација на една фирма во Архивот на Македонија. А, замислете која дискрепанца има од полагање на правосуден испит и регистрација на една фирма“,
истакна адвокат Кадиев.