Засега останува непознато кога и како ќе биде спроведен налогот за апсење на Јеол
Судот во Јужна Кореја одобрил налог за апсење на претседателот на земјата Јун Сук Јеол, јавуваат светските медиуми повикувајќи се на новинската агенција Јонхап.
Јужнокорејскиот претседател беше отповикан и суспендиран од функцијата откако на 3 декември се обиде да воведе воена состојба во земјата, што наиде на жесток отпор од страна на граѓаните.
Дека Окружниот суд во Сеул го одобрил налогот за апсење на претседателот потврди Канцеларијата за истражување корупција (ЦИО), која го истражува Јеол во врска со одлуката за воведување воена состојба.
Сепак, од Канцеларијата не ги коментираат причините за издавањето на налогот, а и самиот суд одбил да излезе со појаснување и коментар.
Засега останува непознато и кога и како ќе биде спроведен налогот за апсење на Јеол.
Дополнително, според Канцеларијата за истражување корупција, судот одобрил и налог за претрес на резиденцијата на Јеол.
Служба задолжена за безбедност на јужнокорејскиот претседател соопштила дека кон налогот ќе се однесува во согласност законската процедура.
Според локалните медиумите, станува збор за прв ваков налог издаден за актуелниот претседател на Јужна Кореја.
Властите во земјата вчера побараа налог за апсење на претседателот, кој се соочува со кривична истрага поради можни обвиненија за организирање бунт, што е едно од ретките кривични дела за кое јужнокорејскиот претседател нема имунитет.
Привремениот лидер на владејачката Партија на народната моќ, Квеон Сеонг-донг, коментирајќи го последниот развој на настаните, изјавил дека обидот за апсење на актуелниот претседател е несоодветен, пренесува Јонхап.
Неуспешниот обид на Јеол да воведе воена состојба ја шокира нацијата, но тој беше отфрлен само неколку часа подоцна по големите реакции на јавноста.
Јужна Кореја оттогаш е во политичка криза. Националното собрание гласаше за импичмент на Јеол на 14 декември, а Уставниот суд отвори постапка за да донесе конечна одлука дали гласањето на парламентот е уставно или не.
Во моментов функцијата претседател ја извршува Чои Санг Мок, кој на неа стапи во петокот откако пратениците гласаа за импичмент на претходниот вршител на должноста претседател Хан Дак Су. Тој на функцијата беше едвај две недели по отповикувањето и суспендирањето на Јун Сук Јеол.
Инаку, одлуката да воведе воена состојба Јеол ја бранеше со наводите дека тоа го сторил за да ја заштити нацијата, а своите политички противници ги означи како антидржавни сили.
Воената состојба е без преседан во модерната демократска ера на Јужна Кореја, која започна во доцните 1980-ти години, по децениската воена диктатура.
Мрачното политичко минато на Јужна Кореја е обележано со низа моќни воени лидери кои постојано прогласуваа воена состојба.
Јужна Кореја воспостави силна демократија по падот на воените режими, но останува силно поларизирана со процеси кои зависат повеќе од харизмата на политичарите отколку од демократските институции, посочуваат аналитичарите.
Во меѓувреме земјата успеа да развие силна економија, четврта по големина во Азија, со познати светски брендови од областа на високата технологија и автомобилската индустрија.
На внатрешните состојби во Јужна Кореја влијае и нејзината комплицирана меѓународна позиција, пред сè поради тензиите со Северна Кореја.