Јаневска: Случаите со Филозофскиот факултет и Славјански универзитет се пријавени во Обвинителство

Министерката нагласи дека МОН постапува строго според законските одредби и не прави разлика меѓу државните и приватните високообразовни установи

Министерството за образование и наука (МОН) започна процедура за поништување дипломи на Филозофскиот факултет при УКИМ и на Славјанскиот универзитет поради констатирани сериозни неправилности, потврди денеска министерката Весна Јаневска. Случаите веќе се пријавени во Јавното обвинителство за понатамошно постапување.

На овој факултет Министерството поништува осум дипломи на веќе поништени осум уписи. Како што рече Јаневска, станува збор за вкупно 17 студенти.

Откриени се нерегуларноси при упис на магистерски и докторски студии на Филозофскиот факултет – Јаневска го чека извештајот

Дел од студентите биле запишани на втор циклус и веќе дипломирале, додека другите го продолжиле образованието на трет циклус студии.

Факултетот има обврска да поништи уште едно преостанато уверение, по што МОН ќе ги поништи документите за сите осум студенти.

Вториот случај се однесува на приватен универзитет каде што се поништени две дипломи на еден студент. Според министерката, студентот истовремено студирал на додипломски и на постдипломски студии.

„Постои сериозно сомнение за фалсификат и на двете дипломи“,

истакна Јаневска.

Јаневска: Надлежните институции треба да кажат дали некој од кадарот на Филозофскиот факултет ќе сноси одговорност за утврдените нерегуларности

Министерката нагласи дека МОН постапува строго според законските одредби и не прави разлика меѓу државните и приватните високообразовни установи.

„Секаде каде што ќе забележиме неправилност, ние постапуваме. Јавното обвинителство дефинитивно ќе утврди понатаму во своите ингеренции како треба да ја води постапката“,

додаде таа по доделувањето на државната награда „Гоце Делчев“.

Јаневска: По случувањето на Филозофскиот факултет, наскоро ќе слушнеме за многу покрупна неправилност што ќе ја изненади јавноста

Информациите, рече Јаневска, за поништените дипломи денеска ќе бидат официјално објавени во дневните весници и на веб-страницата на Министерството за образование и наука.

Ова доаѓа откако беа актуелни случувањата на Филозофскиот факултет при УКИМ каде што е утврдено дека од 2019 година факултетот противзаконски запишувал студенти на магистерски и докторски студии, иако тие претходно завршиле тригодишни стручни студии, што законски не им дозволувало влез во академскиот систем на втор и трет циклус.

Се постапува по препораките на ДПИ, прекинато е студирањето на седум магистранди и на четворица докторанди, велат од Филозофски