„Овие членови на ВМРО-ДПМНЕ ја експлоатираат таа пресуда, се гледа дека таа била нарачка, и како да кажам, што велат Бугарите ‘предварително’ е донесена со цел да се експлоатира во оваа изборна кампања“, рече тој во емисијата „Топ Тема“ на ТВ Телма
Според Јакимовски, тоа што само ВМРО-ДПМНЕ ја споменува американската „црна листа“ во кампањата јасно кажува „кој е нарачателот и кој ја користи таа листа“
Актуелниот градоначалник на општина Карпош, Стевчо Јакимовски, кој како кандидат на коалицијата „Искуство за успех“ в недела ќе се бори за трет мандат, вели дека пресудата што скопскиот Основен кривичен суд му ја изрече во април, годинава е нарачана од ВМРО-ДПМНЕ и оти очекува Апелација да ја врати на повторно разгледување.
Пресудата на Кривичен со кој Јакимовски првостепено е осуден на три и пол години затвор за изградба на општински објект беше едно од прашањата што на кандидатот за градоначалник на Карпош вечерва му беа поставени во емисијата „Топ Тема“ на телевизија Телма.
На прашањето за пресудата и за тоа дали општинската заграда, поради која беше обвинет и осуден, има технички прием, Јакимовски одговори со исправка, велејќи дека не станува не станува збор за општинската зграда, туку за општински бараки и дека оваа тема се експлоатира од ВМРО-ДПМНЕ, како нејзин нарачател.
„Општинската зграда има технички прием. Немаме ние пресуда за општинската заграда, туку за општински бараки. Овие членови на ВМРО-ДПМНЕ ја експлоатираат таа пресуда, се гледа дека таа била нарачка, и како да кажам, што велат Бугарите ‘предварително’ е донесена со цел да се експлоатира во оваа изборна кампања“,
рече тој.
Според Јакимовски, во случајот нема пресуда за кривично дело, туку дека станува збор за, како што кажа, обичен политички прогон.
„Фактот дека судијката е од корпусот на ВМРО-ДПМНЕ и истата како единаесетто рангирана е унапредена во претседател на Судот и нивното континуирано злоупотребување на таа пресуда и користење во оваа изборна кампања јасно кажува кој е нејзин нарачател“,
кажа Јакимовски.
На прашањето дали стравува дека ова апресуда може да се ефектуира по локалните избори, без разлика дали тој ќе победи или ќе изгуби, Јакимовски рече дека очекува од Апелацискиот суд да ја врати на повторно одлучување во Кривичен.
„Јас верувам дека оваа држава има судии коишто си ја знаат работата и верувам дека Апелацискиот суд оваа пресуда ќе ја разгледа коректно и дека истата ќе ја врати назад на повторно разгледување во првостепениот суд, затоа што немам никаква вина и затоа што сум осуден на божја правда. Јас знам што работам, ги познавам законите, и ова е класилен политички прогон и јасно беше дека нив им треба оваа работа, и она што е најбитно – тие си легнаа на тоа уво дека ова пресуда и оваа судијка нив ќе им ја заврши работата и затоа предложија ваков кандидат не знаејќи дека работата нема да биде така како што тие мислеа дека ќе биде од пропаганден аспект, затоа што сепак оваа кампања е долготрајна и нормално граѓаните ќе ве стават на повеќе тестови и ќе видат кој колку знае и што може да направи со општината“,
кажа кандидатот на коалицијата „Искуство за успех“ за градоначалник на Карпош.
Јакимовски беше прашан и за тоа што неговото име се најде на американската „црна листа“, момент што, исто така, го споменуваат од ВМРО-ДПМНЕ во предизборната кампања за локалните избори.
Според Јакимовски, тоа што само ВМРО-ДПМНЕ ја споменува „црната листа“ во кампањата јасно кажува „кој е нарачателот и кој ја користи таа листа“.
„Ние знаеме како оди тоа, две-три белешки од АНБ, две-три белешки од Агенцијата за разузнавање и тие работи така поминуваат. Но, јасно е дека граѓаните на општина Карпош секогаш добивале квалитетни услуги и секогаш имале квалитетно водство од мене како градоначалник и тоа апсолутно не пречи во водењето на мојата кампања. За жал ВМРО-ДПМНЕ е прва на ранг листата по бројот на луѓе ставени на ‘црната листа’’,
рече Јакимовски.
Инаку, во „Топ Тема“ Јакимовски требаше да се соочи со неговиот противкандидат од ВМРО-ДПМНЕ, Сотир Лукорвски со кого в недела ќе ја бијат битката за градоначалничката функција во Карпош, но тој, како што соопшти телевизијата, не се одзвал на поканата.
Во првиот круг од локалните избори за градоначалници Јакимовски освои 8 761 глас, додека за неговиот противкандидат од ВМРО-ДПМНЕ гласаа 10 284 жители на Карпош.