Јакимовски денеска повторно го обвини Мицкоски дека правел крупни грешки поради кои коалицијата не функционирала со целосен капацитет
Мицкоски може да каже зошто не сме се слушнале одамна. Затоа има насушна потреба да лаже, а јас не можам да соработувам со луѓе што лажат, ние сме возрасни луѓе. Тој дел од мозокот, тоа парче од мозокот, не ми функционира така, не можам да разберам како луѓе на такви позиции, со такви академски титули се служат со лаги, изјави градоначалникот на Карпош и претседател на ГРОМ, Стевчо Јакимовски, во своето гостување во „Студио 10“ на ТВ24 зборувајќи за раскинувањето на коалицијата со ВМРО-ДПМНЕ.
Лидерот на ВМРО-ДПМНЕ вчера ги демантираше обвинувањата на Јакимовски за тоа дека стопанственици од Карпош трпеле закани и уцени од оваа партија, а денеска градоначалникот на Карпош повторно го обвини Мицкоски дека правел крупни грешки поради кои коалицијата не функционирала со целосен капацитет.
„Партијата не може да биде ничиј заложник. Сме направиле коалиција за подобро утре. Ако гледаме дека работата не оди, тогаш не сме подготвени да соработуваме. Во изминатиов период ние голтнавме крупни грешки на Христијан Мицкоски, поради кои опозицијата ја држат во лер, без функционирање во полн капацитет. Ако ви кажам дека пред локалните избори ми демонстрираше лажни анкети, па виде дека и ние правиме анкети и беше видно вознемирен. Во минатиот период за време на полицискиот час од ГРОМ никој не одеше по кафеани, тератени, кој ги правеше тие штети? Одлагаше пописи, сè на штета на државата“,
истакна Јакимовски.
Тој додаде и дека постојано трпел навреди од Мицкоски, но не можел да премине преку она, како што рече, што им било направено на граѓаните.
„Трпев и за мене што зборуваше ‘Стевчо е мртов човек, болен и ќе умре, мртов политичар’, тој заслужи бокс да му мавнам, а не коалиција да раскинам. Односот кон мојата партија го трпев, но кога се граѓаните во прашање тоа не може да помине“,
вели Јакимовски.