Со двете лица бил извршен разговор во полициска станица, а дополнително, во текот на денешниот ден, биле повикани и други лица со цел обезбедување дополнителни доказни материјали за кривичното дело по член 149 од КЗ, злоупотреба на лични податоци и прекршок по член 190 став 2 од Изборниот законик
Полицијата во Охрид извршила претрес во дом кај две лица, членови на избирачки одбор предложени од политичка партија, по претходно добиени информации дека фотографирале избирачки список и гласачки ливчиња на првиот круг од претседателските избори, информираат од МВР.
При претресот, како што додаваат од МВР, биле пронајдени два мобилни телефони во кои се наоѓале фотографии од избирачкиот список со лични податоци од гласачи, како и фотографии од гласачки ливчиња со заокружен број.
Фотографиите потоа биле споделени во група за комуникација на мобилна апликација.
„На 06.05.2024, по претходно добиени оперативни податоци за фотографирање на избирачки список и гласачки ливчиња на првиот круг од претседателските избори одржан на 24.04.2024, од судија на претходна постапка обезебедена е наредба за претрес во дом и помошни простории кај М. М. (51) од Охрид и Т. Ц. Т. (44) од Охрид, членови на избирачки одбор предложени од политичка партија. При претресот пронајдени се два мобилни телефони, во кои се пронајдени фотографии од избирачки список со лични податоци од гласачи во избирачкиот список, фотографии од гласачки ливчиња со заокружен број, кои се испраќани од гласачи како доказ дека го дале својот глас за еден кандидат, потоа споделени во креирана група за комуникација на мобилна апликација за комуникација“,
се наведува во соопштението на СВР – Охрид.
Со двете лица бил извршен разговор во полициска станица, а дополнително, во текот на денешниот ден, биле повикани и други лица со цел обезбедување дополнителни доказни материјали за кривичното дело по член 149 од КЗ, злоупотреба на лични податоци и прекршок по член 190 став 2 од Изборниот законик.
По целосно документирање на случајот, ќе следуваат соодветни поднесоци, велат од полицијата.