Европската Унија конечно успеа да одговори на очекувањата на земјите од Западниот Балкан и на нивните граѓани, кои долго чекаат да започнат преговори за членство, оцени бугарскиот европратеник и известувач на Европскиот парламент за земјава, Илхан Кјучук по одлуката на Советот за општи работи на ЕУ да донесе политичка одлука за почеток на преговарачкиот процес со Северна Македонија и Албанија.
„Таквата одлука сега е уште позначајна, не затоа што ги покри разочарувањата од одлуката на Самитот во октомври, туку затоа што Европа и светот се наоѓаат во состојба без преседан. Зеленото светло за почеток на преговори за членство со Северна Македонија и Албанија, покажа дека Европа може да носи одлуки и во кризни моменти“,
изјави Кјучук.
Тој нагласи дека во услови на пандемија на коронавирусот ЕУ не смее да ги заборави земјите од Западен Балкан, па затоа со група европратеници побарале од Европската комисија да предложи ефикасни мерки за помош на државите од регионот за борба против ковид-19.
„Само така ќе бидеме способни да ја совладаме оваа пандемија“,
додаде Кјучук.