Поголемиот недостиг на гориво може да предизвика дополнителен пад на европската економија за уште 1,25 процентен поени во 2023 година и на глобалниот раст за половина процентен поен
Светската економија следната година ќе претрпи потежок удар отколку што претходно се предвидуваше поради последиците од руската војна во Украина, соопшти Организацијата за економска соработка и развој (ОЕЦД).
Во алармантен извештај со наслов „Плаќање на цената на војната“, организацијата со седиште во Париз посочува дека конфликтот ги зголемил инфлаторните притисоци додека трошоците за живот веќе рапидно се зголемуваат.
„Епидемијата на ковид сè уште е товар за глобалната економија, а растот е погоден и од зголемените каматни стапки додека централните банки се борат да ги зауздат галопирачките цени. Повеќето индикатори се влошија, а изгледите за глобалниот раст се песимистички. Во вториот квартал од оваа година, глобалниот раст забави, а податоците во многу економии сега укажуваат на продолжен период на слаб раст“,
се вели во извештајот.
Организацијата ја намали прогнозата за глобалниот економски раст во 2023 година на 2,2 отсто, што е намалување од 2,8 отсто во однос на претходната проценка во јуни.
Рецесии
Изгледите за речиси сите земји во Групата 20 најголеми економии беа намалени, освен за Турција, Индонезија и Велика Британија, иако се прогнозира дека последнава ќе забележи нула раст.
Растот во САД, најголемата светска економија, се очекува да забави до 0,5% во 2023 година.
Прогнозата за раст за Кина, чија економија е погодена од строги ограничувања поради коронавирусот, беше нагло намалена за оваа година на 3,2%, додека за 2023 година беше намалена на 4,7%.
Германија се очекува да влезе во рецесија следната година, при што најголемата европска економија веќе се забележа пад за 0,7%, што е за 2,4 процентни поени помалку во однос на претходната прогноза.
Економијата на Германија е најтешко погодената во Европа, бидејќи во голема мера се потпира на руските испораки на природен гас, што Москва нагло ги намали како одговор на западните санкции.
Еврозоната како целина ќе забележи слаб раст од 0,3%, што е нагло намалување од 1,6%.
ОЕЦД ја задржа својата прогноза за глобалниот раст непроменета на три отсто во 2022 година, откако претходно ја намали.
За да се нагласи влијанието на руската инвазија на Украина, ОЕЦД соопшти дека глобалното производство во 2023 година сега се очекува да биде 2,8 трилиони долари помало од претходната проценка пред конфликтот во декември 2021 година.
Неизвесност
Војната ги зголеми цените на енергијата и храната поради загриженоста за снабдувањето, бидејќи Русија е главен производител на нафта и гас, а Украина е клучен извозник на жито во земјите ширум светот.
Инфлацијата растеше уште пред конфликтот поради прекини во глобалниот синџир на снабдување откако земјите излегоа од карантините поради ковид-19.
„Последиците од војната и континуираното влијание на епидемиите на ковид-19 во некои делови од светот го намалија растот и извршија дополнителен притисок врз цените. Инфлациските притисоци се шират, со повисоки енергетски, транспортни и други трошоци кои ги притискаат цените“,
констатират од ОЕЦД.
ОЕЦД ја зголеми својата прогноза за инфлацијата во Г20 на 8,2 отсто во 2022 година и на 6,6 отсто следната година.
Владите најавија итни мерки за да им помогнат на домаќинствата и бизнисите да се справат со зголемените животни трошоци. Но, фискалните мерки за надоместување на трошоците за енергија, според оценката на ОЕЦД „беа слабо насочени“.
Во меѓувреме, централните банки ги зголемија каматните стапки, потег потребен за да се скроти инфлацијата што може да ги турне економиите во рецесија.
Исто така, ОЕЦД констатира дека затегнувањето на монетарната политика е „клучен фактор што го забавува глобалниот раст“.
Поголемиот недостиг на гориво може да предизвика дополнителен пад на европската економија за уште 1,25 процентни поени во 2023 година и на глобалниот раст за половина процентен поен, заклучува ОЕЦД во извештајот.