Според ЦУК, сè уште се активни пожарите кај селото Елово во скопската општина Студеничани, кај селото Мелница во Општина Чашка, потоа пожарот кај Струга – меѓу селата Ново Село и Долно Татеши и во Општина Битола кај местото викано Тепсија. Најмногу пожари, како што може да се види од извештајот на ЦУК, вчера биле регистрирани и на нив било интервенирано во Општина Прилеп – вкупно пет
Во изминатото деноноќие на територијата на земјава имало вкупно 23 пожари на отворен простор, информираат од Центарот за управување со кризи (ЦУК) во утринскиот извештај.
Од пожарите, 19 се изгаснати, но четири, како што информираат од ЦУК и понатаму се активни.
Според ЦУК, станува збор за пожари кај селото Елово во скопската општина Студеничани, каде гори нискостеблеста шума, во селото Мелница во Општина Чашка каде од пламените јазици е зафатена букова шума, а и понатаму активните се пожарите кај Струга – меѓу селата Ново Село и Долно Татеши и во Општина Битола кај местото викано Тепсија. Во овие два пожари гори ниска вегетација, односно сува трева.
Од изгаснатите 19 пожари во изминатите 24 часа два биле во Скопје, исто толку на територијата на Општина Штип, три во Битола, а еден во Општина Долнени, кај селото Житоше.
Инаку, според извештајот на ЦУК, најмногу пожари вчера биле регистрани и на нив било интервенирано во Општина Прилеп – вкупно пет. Покрај две села на територијата на оваа општина, сува трева горела кај фирмата „Бимфуд“, фабриката „Чавле“ и „Дата центар“ во градот Прилеп.
Три пожари вчера биле изгаснати и во Куманово и Кумановско, еден во Струмица, помеѓу селата Гечерлија и Чанаклија, а еден пожар имало и кај селото Здуње во Гостиварско.
Во сите овие случаи, односно местата каде што се изгаснати пожарите, горела сува трева, нискостеблеста шума и депонија.