Изборниот ден се одвива мирно, како што пренесува БГНЕС, без посериозни нарушувања на изборниот процес. Гласачките места се отворени од 7 часот, а се затвораат во 20 часот
Во Бугарија денеска се одржуваат парламентарни избори по седми пат од 2021 година и втори предвремени од почетокот на годинава. На изборите за Национално собрание учествуваат 19 партии, девет коалиции и еден независен кандидат, кои се борат за 240 места во парламентот.
Изборниот ден се одвива мирно, како што пренесува БГНЕС, без посериозни нарушувања на изборниот процес. Гласачките места се отворени од 7 часот, а се затвораат во 20 часот.
Последните избори се одржаа на 9 јуни. Тогаш ГЕРБ, партијата Продолжуваме со промените и Има таков народ не успеаја да формираат влада.
Според предизборните анализи, ГЕРБ на Борисов е главен кандидат за победа и сега, но и покрај прогнозираното водство од 26%, веројатно ќе се соочи со тешкотии во обезбедување коалициски партнери. Во меѓувреме, интересот за гласање опаѓа поради страв од манипулации.
Бугарија не успева да формира стабилна влада уште од 2020 година откако протестите против корупцијата ја соборија владејачката коалиција предводена од партијата ГЕРБ.
Премиерот Христијан Мицкоски вчера порача дека очекува успешни, фер и демократски избори, да се избере влада која ќе промовира стабилност во регионот и добрососедски односи. На прашањето кого би издвоил како подобар соговорник, дали Бојко Борисов од ГЕРБ или Кирил Петков од Продолжуваме со промената (ПП), Мицкоски посочи дека не би можел да издвои, но оти е логично да сака да победи партијата со која се дел од Европската народна партија.
„Можам да кажам дека со партијата ГЕРБ, која ја води Бојко Борисов, сме во исто семејство, во Европската народна партија. Логично е да посакам уште една политичка партија што доаѓа од нашето семејство да победи на изборите во Бугарија“,
кажа Мицкоски.
Според анализите, на Бугарија ѝ треба стабилна и функционална влада за да може го забрза финансирањето од ЕУ, да ја внесе земјата во еврозоната и целосно да се приклучи во Шенген-зоната. Како што оценуваат тамошните познавачи, новите избори можат да го зголемат ризикот од дополнителни одложувања.