Мажите од Египет и Бангладеш беа собрани во Медитеранот минатата недела од италијанската морнарица, а потоа однесени во Албанија за да ги процесуираат нивните барања за азил
Суд во Италија пресуди седуммина мигранти кои беа префрлени во центар за баратели на азил во Албанија да бидат однесени во Италија, што е нов удар на договорот што италијанската премиерка Џорџија Мелони го постигна со нејзиниот албански колега Еди Рама.
Мажите од Египет и Бангладеш беа собрани во Медитеранот минатата недела од италијанската морнарица, а потоа однесени во Албанија за да ги процесуираат нивните барања за азил.
Веќе се одбиени пет барања, но италијанските судии ја одложија нивната депортација.
Два центри за баратели на азил беа отворени во Албанија минатиот месец, но оттогаш останаа главно празни.
Првата група мажи, исто така од Египет и Бангладеш, требаше да бидат донесени во октомври, но им беше дозволено да заминат во Италија откако италијанските судови пресудија дека ниту Египет ниту Бангладеш не можат да се сметаат за безбедни земји, што е услов за процесуирање во албанските кампови.
Во меѓувреме, владата на десничарската премиерка Мелони со декрет усвои нова листа од 19 наводно безбедни земји, вклучувајќи ги и тие две земји, но италијанскиот суд побара да се провери законитоста на таа одлука во Европскиот суд на правдата. Ниту Бангладеш ниту Египет не се сметаат за безбедни земји според европските закони.
Италија е првата членка на Европската Унија која ги обработува барањата за азил надвор од ЕУ. Другите членки на Европската Унија внимателно ја следат ефективноста на планот на Мелони бидејќи размислуваат за сличен пристап.
Мелони и Рама минатата година објавија дека постигнале договор за сместување до три илјади илегални мигранти спасени во Медитеранот во два центри во Албанија. Италијанската премиерка се надева дека годишно низ камповите ќе поминуваат до 36 000 мигранти, а целата шема би требало да чини 800 милиони евра за пет години.