Истражувањето покажува дека само 24 отсто од испитаниците се согласуваат да се промени Уставот за внесување на Бугарите со цел да продолжи евроинтегративниот процес
Речиси две третини или 65 отсто од испитаниците сметаат дека измените на Кривичниот законик се донесени за заштита на политичките елити од минати криминални дејствија
Најпоразителни се податоците за младите, а според Институтот за демократија, тие се одраз на незадоволство кај граѓаните од политиките на ЕУ кон државата
Поддршката на македонските граѓани за членство во Европската Унија е на историски најниското ниво, покажува последното истражување на Институтот за демократија „Социетас цивилис“ во соработка со Фондацијата „Конрад Аденауер“.
За речиси десет години падот на поддршка за членство на РСМ во ЕУ е околу 30 отсто. Ако во 2014 година, 90 отсто од испитаниците били „ЗА“ членство на РСМ во Унијата, денес тој процент изнесув 60 отсто. Најпоразителни се податоците за младите, а според Институтот за демократија, резултатите се одраз на незадоволство кај граѓаните од политиките на ЕУ кон државата.
60 отсто од македонското население ги поддржува евроинтегративните процеси на земјата, што е намалување од 4 отсто во однос на претходната година и го означува најнискиот процент на поддршка досега. Само половина од младите (18-24 години) го поддржува членството во ЕУ.
За 20 отсто од населението членството во ЕУ воопшто не е важно, а 12 отсто од населението е отворено евроскептично.
Истражувањето покажува дека само 24 отсто од испитаниците се согласуваат да се промени Уставот за внесување на Бугарите со цел да продолжи евроинтегративниот процес.
Речиси две третини или 65 отсто од испитаниците сметаат дека измените на Кривичниот законик се донесени за заштита на политичките елити од минати криминални дејствија.
Како што се наведува во истражувањето, покрај турбулентниот пат кон неа, Унијата продолжува да биде перципирана како најголем донатор, економски партнер и сојузник на државата.
Податоците кои се користени во анализите произлегуваат од анкетно истражување на јавното мислење спроведено во текот на месец ноември 2023 година на примерок од 1 000 испитаници.
Поздравни обраќања на настанот дадоа претседателот на Институт за демократија, Марко Трошановски, и Даниел Браун, директор на канцеларијата на Фондацијата „Конрад Аденауер“ во Скопје. Свое воведно обраќање даде и Ото Граф, заменик-амбасадорот и раководител на економскиот сектор на Амбасада на СР Германија во Република Северна Македонија.
Трошановски информира дека од 2014 година досега, ЕУ има најнизок степен на поддршка, која годинава изнесува 60 отсто, но дека сепак мнозинството граѓани ја подржуваат ЕУ.
„Голем дел на овој пад се должи на горчливото искуство на земјата со критериумите што ги има за започнување на преговори, кои не секогаш беа објективни. Но, таа перспектива не треба да биде приоритет, туку приоритет треба да биде што нашата земја прави за да се приближи до Унијата. Треба да се фокусираме на патот кон ЕУ и реформите и тие да ги правиме поради самите себе. Фрустрацијата којашто ја чувствуваме не треба да биде аргумент за скршнување од овој пат“,
смета тој.
Браун истакна дека не е изненаден од резултатите кои се должат на тешкотиите што Северна Македонија ги имаше во евроинтегративниот процес изминатите години.
„Од една страна, не е изненадување дека паѓа ентузијазмот, но, од другата страна, бројот на луѓе коишто се евроскептици не се зголемува. Тоа значи граѓаните покажуваат фрустрација. Зборуваме за земја којашто две декади е кандидатска членка, а има и нерешени прашања со соседите. Сите тие работи се разбирливи, но земјата има многу задачи коишто треба да ги заврши, односно потребен е прогрес во реформскиот процес. И двете страни треба да работат за Северна Македонија да се приближи кон ЕУ, затоа што ако сме искрени, сите ние ја сакаме истата работа, а тоа е интеграција на С. Македонија во ЕУ“,
рече Браун.
Граф потенцира дека С Македонија е многу успешна во бирократскиот дел од скрининг-процесот, кој е успешно завршен.
„Од друга страна, за граѓаните е многу поважно што може да почувствуваат од реформскиот процес и ова треба да е приоритет во следниот период“,
додаде тој.
Двете анализи ги презентираа авторите Иван Дамјановски, професор на Правниот факултет „Јустинијан Први“ при УКИМ и Анамарија Велиновска, истражувачка во Институтот за демократија.
Осврт на истражувачките трудови дадоа вицепремиерот за европски прашања Бојан Маричиќ, претседателот на Комисија за европски прашања во Собранието, Арбр Адеми, и претседателот на Националниот совет за евроинтеграции, Александар Николовски.
Маричиќ рече дека секој што е во политика треба да чувствува одговорност за изминатите 18 години колку што земјата е кандидат за членка и дека годишнините треба да се користат за резиме каде сме погрешиле и што понатаму.
„Сè што не се уставни измени ние направивме до минатата недела, го завршивме скринингот и ќе испратиме сè она што беше бирократски процес во Брисел. Поважното прашање е решавање на проблемот за наредната година да немаме ситуација во која уште 10% помалку ќе веруваат во ЕУ“,
рече тој.
Адеми смета дека сите политичари и партии се одговорни за падот на поддршката за процесот на членство на нашата земја во ЕУ.
„Водејќи грижа за глас повеќе, не водиме грижа за стратешките цели на нашата земја, така расте популизмот и национализмот, па и евроскептицизмот. Нема подобра алтернатива од ова сега што се нуди“,
додаде тој.
Податокот дека младите се најмногу евроскептични е најзагрижувачки податок, смета Николовски.
„Како е возможно држава којашто е во војна, Украина, почна преговори, а Македонија не почна преговори. Покрај политичкото прашање, многу поважен е принципот на владеење на правото, бидејќи мислам дека основата зошто не почнуваме преговори е поради високото ниво на криминал и корупција и принципот на неказнивост“,
вели Николовски.