Истражувачката дејност на Универзитетот во Тетово се реализира во согласност со научните критериуми, реагираат од оваа високообразовна институција по пишувањата дека најмалку седум професори плагирале научни трудови.
„Универзитетот во Тетово внимателно го следи објавувањето на информациите, кои фрлат сомнеж во научните истражувања на некои професори на Факултетот за медицински науки. Иако не е во должност на нашата институција да ги коментира ’откритијата‘ на ’списанијата‘ со анонимни автори, ние ја информираме јавноста дека образовната и научно-истражувачката дејност на академските единици на Универзитетот во Тетово се спроведува во согласност и целосно почитување на научните критериуми. Академските и наставно образовните унапредувања, како и објавувањето на научни трудови се предмет на механизми за филтрирање, со кои се потврдува или дисквалификува одреден придонес за истражување“,
велат од тетовскиот Универзитет.
Исто обвинуваат и дека информациите за плагирање се објавени од страна на анонимни издавачи, списанија без адреса и од луѓе со сомнителни агенди.
Ваквата реакција следува откако пред неколку дена „Интелектуалната иницијатива за подобрување на квалитетот во универзитетското образование“ (NIRCAU) го претстави своето обемно истражување во кое ги анализира на трудовите на професорите на Медицинскиот факултет при Универзитетот во Тетово.
Во последното издание на публикацијата „Веритас“, како што пишуваа медиумите на албански јазик, тие посочуваат дека научните трудови на најмалку седум универзитетски професори се плагијат или копија на веќе објавени дела.