Според вицепремиерот Бојан Маричиќ, Поглавјето 24 „Правда, слобода и безбедност“ на чиј објаснувачки скрининиг-состанок учествува денеска во Брисел, претставува срцето на преговорите, заедно со Поглавјето 23 „Правосудство и темелни права“. Визијата каде што сме денес и каде што треба да бидеме до 2030 година, додава тој, ќе се одрази во бараниот патоказ за владеење на правото
Вицепремиерот за европски прашања Бојан Маричиќ денеска учествува на објаснувачкиот скрининг-состанок во Брисел за Поглавјето 24 „Правда, слобода и безбедност“.
Тој во своето обраќање кажа дека македонскиот преговарачки тим од оваа област се надоврзува на претходно стекнатото искуство и продолжува со новите законски регулативи од 2019 година до денеска, а напомена дека ова е голема предност што треба да ја искористиме.
„Имаме капацитет и мотивација соодветно да ги подготвиме нашата земја и нашите институции преку градење силен и добро интегриран административен капацитет на агенциите за спроведување на законот и другите релевантни тела, од кои се очекува да ги постигнат потребните стандарди“,
рече вицепремиерот за европски прашања и главен преговарач на земјава со ЕУ, Бојан Маричиќ на денешниот објаснувачки скрининг состанок во Брисел.
Како што информира Секретаријатот за европски прашања (СЕП), според Маричиќ, Поглавјето 24 „Правда, слобода и безбедност“ е срцето на преговорите, заедно со Поглавјето 23 „Правосудство и темелни права“, пред и сега како дел од Кластерот „Темели“, за кое изрази уверување дека визијата каде сме денес и каде треба да бидеме до 2030 година ќе се одрази во бараниот Патоказ за владеење на правото.
Во своето обраќање, Маричиќ посочи оти земјава дејствува во борбата против тероризмот, а во таа насока кажа дека е донесен Закон за спречување перење пари и финансирање тероризам – со цел усогласување со 5 Директива за АМЛ за спречување на употребата на финансискиот систем за целите на перење пари или финансирање тероризам и ревидираните препораки на Работната група за финансиска акција.
„Заедничкиот акциски план за борба против тероризмот за Западен Балкан меѓу Европската комисија и органите на Република Северна Македонија, како рамка за заедничко дејствување во борбата против тероризмот, континуирано се спроведува“,
додаде вицепремиерот.
Меѓу другото, Маричиќ истакна дека Владата ја има усвоено Националната процена на ризикот во март 2020 година во однос на перење пари и финансирање тероризам.
Дополнително, вицепремиерот го спомена усвоениот Национален план за реинтеграција, ресоцијализација и рехабилитација на повратниците борци и членови на нивните семејства со учество на повеќе државни институции и општествени чинители со цел да се имплементираат утврдените приоритети во спречувањето на насилен екстремизам и радикализација.
Денеска завршува вториот ден од презентациите на Европската комисија за законодавството и стандардите на ЕУ во областа на правдата, слободата и безбедноста за македонскиот и албанскиот преговарачки тим во оваа област.
Од понеделник, пак, започнуваат објаснувачките скрининг состаноци за Поглавје 23 – „Правосудство и темелни права“.