Истражување од Шкотска на кое се повикува германскиот имунолог, покажало дека по четири недели од примањето на првата дека на вакцината, хоспитализацијата на заболените од ковид-19 е намалена за 85% и 94% кај лицата кои биле вакцинирани со вакцините на „Фајзер“ и на „Астра Зенека“
Искусен германски имунолог ја повика неговата земја да ја смени одлуката и да дозволи вакцината на „Астра Зенека“ и Универзитетот „Оксфорд“ да се употребува и за лицата постари од 65 години, а комисијата за имунизација на Германија, пак, веќе ја разгледува препораката, пишува „Би-би-си“.
Карстен Вацл, првиот човек на германското Здружение за имунологија, предвидува дека регулаторните тела ќе мора да ја повлечат одлуката.
„Мислам дека Германија наскоро ќе го промени курсот. Знаеме дека вакцината е ефикасна кај таа возрасна група. Неодамнешните податоци од Шкотска покажуваат вакцината предизвикува имунолошки одговор, со неа возрасните лица се заштитени од развивање тешка слика“,
вели тој во интервју за „Би-би-си“.
Европската агенција за лекови (ЕМА) ја одобри вакцината на „Астра Зенека“ и „Оксфорд“ во јануари за сите возрасни групи, но Германија е една од неколкуте земји во ЕУ кои изразија сомнеж во нејзината ефикасност кај повозрасните и затоа одлучи да не ја користи за лицата постари од 65 години. Германскиот здравствен систем прими 1,17 милиони дози од оваа вакцина, а досега се искористени нешто помалку од 300 000.
Иста препорака дадоа и регулаторните тела во Франција и Италија, оправдувајќи ја со недоволни податоци за ефикасноста кај оваа категорија граѓани.
Истражувањето од Шкотска кое ги побива сомнежите на овие земји за ефикасноста, и на кое се повикува германскиот имунолог, покажало дека по четири недели од примањето на првата дека на вакцината, хоспитализацијата на заболените од ковид-19 е намалена за 85% и 94% кај лицата кои биле вакцинирани со вакцините на „Фајзер“ и на „Астра Зенека“. Кај лицата над 80 години, бројот на прими во болница е намален за 81%.