Тендерот за избор на консултант и надзор на автопатиштата на коридорот 8, но и 10-д се распиша по втор пат откако првата постапка беше поништена бидејќи избраниот понудувач во предвидениот рок не ја обезбеди банкарската гаранција
Италијанската компанија „ИРД инженеринг“ денеска доставила банкарска гаранција и в четврток треба да се потпише договор за да биде надзорен консултант за проектот за изградба на автопатот на коридорот 8 што ќе го гради фирмата „Бехтел и Енка“.
Оваа информација денеска ја откри првиот вицепремиер Артан Груби, на средба со граѓаните што ДУИ ја организираше во Општина Врапчиште.
„Во четврток во 9 часот ќе го потпишеме договорот со избраната компанија и ќе започнеме со работа со ’Бехтел и Енка‘ за коридорот 8, автопат со три ленти со кој ќе ја поврземе нашата држава со Албанија. Тоа е супер голем проект за кој издвоивме 300 милиони евра, од сите капитални инвестиции, од општиот буџет од 800 милиони евра, 300 милиони наменети се само за овој проект. Дали некогаш сме биле помоќни во Владата? Никогаш!“,
рече Груби.
Иако првиот вицепремиер во говорот, што го пренесоа од партијата, споменува само еден коридор, повикот за избор за надзор од Јавното претпријатие за државни патишта се однесуваше на коридорите 8 и 10-д односно на делниците Гостивар – Кичево, Тетово – Гостивар, Требениште – Струга – Ќафасан, како и Прилеп – Битола.
Тендерот за избор на консултант и надзор на автопатиштата на коридорот 8, но и 10-д се распиша по втор пат откако првата постапка беше поништена бидејќи избраниот понудувач во предвидениот рок не ја обезбеди банкарската гаранција за навремено и квалитетно извршување на договорот.
„ИРД Инженеринг“ беше избрана во декември 2022 откако се јави на тендерот со понуда во износ од 1 374 304 070 денари. На тендерот, кој беше отворен од 15 септември до 17 октомври лани, аплицираа и „Ингероп“ која конкурираше со 1 106 040 600 денари, како и „Хил“, со понуда од 1 533 721 722 денари, додаваат од ЈПДП.