Министерот за здравство Арбен Таравари денеска, во изјава за медиумите, информира дека утринава имал состанок со директорот на ДСЗИ и дека инспектори вршат инспекциски надзор на Детската клиника и на Клиниката за респираторни заболувања кај деца „Козле“
Инспектори од Државниот санитарен и здравствен инспекторат (ДСЗИ) денеска во просториите на Универзитетската клиника за детски болести извршиле вонреден надзор на целокупната документација и зеле изјави од сите лекари инволвирани во случајот со починатото 14-месечно бебе.
„Стручната истрага продолжува сѐ до расветлување на случајот“,
се наведува во соопштението објавено на веб-страницата на Детската клиника.
Министерот за здравство Арбен Таравари денеска, во изјава за медиумите, информира дека утринава имал состанок со директорот на ДСЗИ и дека инспектори вршат инспекциски надзор на Детската клиника и на Клиниката за респираторни заболувања кај деца „Козле“.
Паралелно со вонредниот инспекциски надзор од ДСЗИ, формирана е и комисијата при Министерството за здравство која треба да го расчисти случајот.
Министерот вчера потврди дека 14-месечното бебе претходно било одбиено да се хоспитализира, но посочи дека без разлика каков ќе биде исходот од истрагата на инспекцијата, треба да има одговорност за случајот.
„Вратено било, за жал. Дали поради лекарска грешка или незнаење, треба да се констатира. Дефинитивно треба да има одговорност. Меѓутоа не очекувајте од мене уште денес да судам како било. Дозволете компетентните органи да испитаат сѐ во детали. На крајот, некој мора да сноси одговорност кога има вакви трагични случаи. Дојдени биле двајца анестезиолози вечерта кога починало детето, имало обид да се интубира, но, со ниска сатурација и аритмија било проблем“,
изјави вчера Таравари.
Директорот на Државниот санитарен и здравствен инспекторат, Кирил Лазов, завчера изјави дека ДЗСИ ќе направи вонреден инспекциски надзор во сите установи каде што било лекувано 14-месечното бебе, за да се утврди вистинитоста во однос на тоа дали имало евентуални пропусти во неговото лекување.
14-месечно бебе починало утринава на Детската клиника во Скопје
Од пратеничката група на опозицискиот „Европски фронт“ денеска побараа оставка од министерот Таравари.
Оттаму оценија дека Таравари тенденциозно ја релативизира целата ситуација, што во нормална држава, како што рекоа, ќе резултираше со негова и оставка на директорот на Клиниката, Реџеп Мемеди.
„Деновите минуваат, а директорот на Детската клиника Реџеп Мемеди и понатаму нема слух за скандалите во установата каде што е директор, поради што животот го загуби 14-месечно бебе, а пак претходно деца беа тепани од вработени и им беше забрането да зборуваат албански. Секако дека е зафатен со многу работа за да ги вработи членовите на неговото семејство, неговиот братучед и во исто време да ги прикрие скандалите за финансиска злоупотреба во оваа клиника“,
порачаа пратениците од пратеничката група на „Европскиот фронт“.
Бебето почина на 5 октомври на Детската клиника, а дел од медиумите пренесоа дека претходно неколкупати било одбивано да се хоспитализира, иако неговите родители трипати го носеле на преглед на оваа клиника.