„На средбата од страна на ресорните министри беа презентирани можностите за инвестирање во нашата земја и стана збор за опциите за соработка на конкретни инфраструктурни проекти, како и за инвестиции во областа на агро-бизнисот, соларната енергија и туризмот. Дополнително, се зборуваше и за приоритетните области за инвестиции кон кои е фокусирана Владата, покрај обновливите извори и реализација на ‘Зелената агенда’, дигитализацијата, иновациите и современа технологија“, посочуваат од Владата во врска со посетата на владината делегација во ОАЕ
Инфраструктурни проекти, инвестиции во областа на агро-бизнисот, соларната енергија и туризмот се во фокусот на разговорите на владината делегација предводена од премиерот Димитар Ковачевски со претставници на Фондот за развој на Абу Даби, информираа вечерва од владиниот прес-центар.
Ковачевски заедно со министрите за финансии Фатмир Бесими, за транспорт и врски Благој Бочварски и за земјоделство, шумарство и водостопанство Љупчо Николовски во рамки на посетата на Абу Даби, оствариле средба со Мохамед Саиф Ал Суваиди генерален директор на Фондот за развој на Абу Даби (АДФД) како и со Калифа ал Кубаси, заменик генерален директор, како и останати претставници на раководството на фондот.
„На средбата од страна на ресорните министри беа презентирани можностите за инвестирање во нашата земја и стана збор за опциите за соработка на конкретни инфраструктурни проекти, како и за инвестиции во областа на агро-бизнисот, соларната енергија и туризмот. Дополнително, се зборуваше и за приоритетните области за инвестиции кон кои е фокусирана Владата, покрај обновливите извори и реализација на ‘Зелената агенда’, дигитализацијата, иновациите и современа технологија“,
информираат од владиниот прес-центар.
Од Владата додаваат дека Фондот за развој на Абу Даби (АДФД) е владинo тело и меѓународен инвеститор со инвестиции кои се проценуваат во повеќе милијарди долари, а присутен е и во развиени и во земји во развој во Северна Америка, Европа и Азија.
„Постои голем потенцијал за развој на соработката меѓу двете земји и за реализација на инвестиции од ОАЕ во земјава“,
истакнуваат од Владата.
Меѓу другото, соговорниците разговарале и за предизвиците со кои Европа и светот се соочуваат во поглед на најголемата економско-енергетска криза како и за можностите за менаџирање и надминување, при што бил истакнат заедничкиот став дека најдобар начин за надминување на тие предизвици е реализација на инвестиции во инфраструктура, како и во иновации и нови технологии.
„Двете страни ја истакнаа посветеноста за градење на дијалог помеѓу двете земји кој ќе води кон унапредување на взаемните односи. Беше истакнато дека паралелно со политичките односи, интензивирањето на економските односи е од голема важност“,
се заклучува во владиното соопштение.