Индексот на потрошувачките цени за 19-те земји кои го користат еврото се зголеми за 9,2 отсто во декември во споредба со претходната година, што е најбавно темпо од август, објави Еуростат
Европската унија (ЕУ) ја заврши годината со одредено олеснување бидејќи растот на цените забави, но трошоците за живот останаа високи, објави „Асошиејтед прес“.
Индексот на потрошувачките цени за 19-те земји кои го користат еврото се зголеми за 9,2 отсто во декември во споредба со претходната година, што е најбавно темпо од август, објави денеска агенцијата за статистика на ЕУ, Еуростат.
Ова е втор последователен пад на инфлацијата од јуни 2021 година.
Во ноември стапката падна на 10,1 отсто, додека во претходниот месец беше рекордни 10,6 отсто.
Домаќинствата и бизнисите ширум Европа се оптоварени со растот на цените на енергијата, поради руската инвазија на Украина.
Најновите податоци покажуваат дека енергетската криза засега можеби се намалува: растот на цената на енергијата е забавен на 25,7 отсто на годишно ниво, што е намалување од 34,9 отсто во ноември и 41,5 отсто во октомври.
Цените на природниот гас паднаа од историски највисоките нивоа, бидејќи ЕУ за зимата главно ги наполни своите магацини со гас од други земји, додека повисоките температури ги намалија стравувањата од недостиг на енергија за време на грејната сезона.
Цените на храната, другиот главен двигател на европската инфлација, беа прилично стабилни. Цените на храната, алкохолните пијалоци и тутунот во декември пораснале со годишна стапка од 13,8 отсто, што е нешто повисоко од претходниот месец.
Зголемените трошоци за живот доведоа до страв од рецесија и ги поттикна работничките немири ширум Европа поради тоа што платите не се во чекор со растечките цени.
Минатиот месец Европската централна банка ја зголеми референтната стапка за половина поен, малку забавувајќи го рекордното темпо на зголемување на каматните стапки, но најави уште зголемувања.
На истиот потег се одлучија и централните банки во САД и Велика Британија.