Со ова Иранците би требало да може да ги заобиколат владините ограничувања за пристап до интернет и одредени социјални медиуми
Милијардерот Илон Маск, кој е сопственик на „Спејс екс“, соопшти дека компанијата сега има речиси сто активни сателити што овозможуваат интернет-услуга на „Старлинк“ во Иран. Ова доаѓа три месеци откако тој преку Твитер најави нивна активација поради тамошните протести.
„Се приближуваме до сто активни ’Старлинкс‘ во Иран“,
твитна Маск.
Милијардерот во септември изјави дека ќе ги активира сателитите „Старлинк“ во Иран како дел од напорите на САД да ја „зголемат слободата на интернетот и слободниот проток на информации“ за Иранците.
Широкопојасен интернет обезбеден преку сателити, може да им помогне на Иранците да ги заобиколат владините ограничувања за пристап до Интернет и одредени социјални медиуми.
Ограничувањата ги наметнува власта која се соочува со масовни антивладини протести кои во земјата избувнаа откако 22-годишната Махса Амини, која беше уапсена од озлогласената полиција за морала поради неносење марама на главата, почина во полициски притвор во септември.