Ковачки рече дека очекувањата се Мицкоски, чиј мандат истекува, на конгресот во декември да биде кандидат за нов мандат на чело на ВМРО-ДПМНЕ. И партискиот потпретседател Николоски вечерва даде јавна поддршка за реизбор на актуелниот лидер
Во однос на барањето за избори, Ковачки рече дека тие се единственото решение за излез бидејќи со СДСМ нема да има нова влада туку може да има само продлабочување на економската, енергетската и политичката криза
На 12 декември во Скопје ВМРО-ДПМНЕ ќе одржи редовен паркиски конгрес на кој ќе се трасира патот за идното делување и политиките на партијата, соопшти членот на Извршниот комитет (ИК), Драган Ковачки.
Датумот за конгресот е утврден вечерва на седницата на ИК која се одржува во партиското седиште. На конгресот ќе се избира и лидер со оглед на тоа што мандатот на Христијан Мицкоски истекува кон крајот на декември.
„Очекуваме претседателот да биде кандидат на претстојниот конгрес согласно резултатите кои ги покажавме на последните локални избори“,
рече Ковачки.
И потпретседателот на партијата, Александар Николоски, зборувајќи за претстојниот конгрес во емисијата „Клик плус“ на ТВ21, рече дека Христијан Мицкоски ја има целосната негова поддршка за реизбор на чело на партијата.
Покрај за конгресот и за партиските прашања, на седницата на ИК се разговарало и за актуелната општествено политичка состојба во државата, за што Ковачки истакна дека ВМРО-ДПМНЕ смета оти брзи избори се единственото решение за излез од кризата, бидејќи владата на Зоран Заев и СДСМ немаат кредибилитет по резултатите на локалните избори.
„Извршниот комитет смета дека актуелната влада го загуби кредибилитетот од граѓаните и волјата на народот е јасно изразена на последните избори кои СДСМ ги загуби со над 100 000 гласови разлика. ВМРО-ДПМНЕ победи во 42 општини плус градот Скопје, што претставува историски најдобар резултат на која било опозициска партија во Македонија. Тоа за нас претставува полна одговорност за оправдување на очекувањата на граѓаните и посветена работа на градоначалниците на ВМРО-ДПМНЕ кои веќе започнаа со промените. Резултатот од изборите е јасна порака дека народот бара промени во централната власт, народот е незадоволен од тешката економска криза, растечката инфлација, како и континуираните неуспеси и потфрлањето на планот на европските интеграции“,
рече Ковачки.
Со СДСМ, рече тој, нема да има нова влада туку може да има само продлабочување на економската, енергетската и политичката криза.