Во текот на неделата што измина (од 31 август до 6 септември) во земјава се регистрирани 21 смртен случај на пациенти со ковид-19, што претставува намалување од 42,9 проценти во однос на една недела претходно, покажува неделниот извештај на Институтот за јавно здравје (ИЈЗ).
Пријавените смртни случаи се од 13 града, а во однос на возраста најголем дел од нив – 16 биле над 60 години. По двајца починати биле во старосните групи од 50-59 и од 40-49 години, а еден смртен случај е во групата од 30-39 години.
Кога станува збор за бројот на новозаразени во текот на мината недела, тој изнесува 789 пациенти од 32 града. Тоа претставува зголемување од 18,9% во однос на една недела претходно. Тие се регистрирани од направени 9 734 теста.
„Најголем дел од регистрираните случаи се од Скопје (221 или 28%). Во истиот период, во 17 града, бројот на новодијагностицирани е под 20. Процентот на позитивни случаи од тестирани изнесува 8,1% што претставува зголемување од 1,4% во однос на претходната недела. Регистрирани се заболени лица во сите возрасни групи. Најзастапени се возрасните групи на лица на возраст од 30-39 и над 60 години со 174 (22%) и 172 (21,8%) позитивни, соодветно“,
велат здравствените власти.
Голем број заболени се регистрира и кај лицата во возрасната група од 40-49 – 134 случаи или 17%. 129 случаи или 16,3% се кај групата од 50-59 години. Бројот на заразени кои се на возраст од 20-29 години е 118 или 14,9%, а кај деца и тинејџери на возраст од 10-19 години имало 40 случаи или 5,1% од вкупниот број на новозаразени. Најмал број е регистриран кај децата од 0-9 – 20 случаи или 2,8% од вкупниот број на заразени.
Од вкупниот број нови случаи, 237 или 31,3% имале контакт со потврден случај, а меѓу новозаболените 29 лица се со историја на патување во последни 14 дена.
По добиени 2 негативни теста за присуство на вирусот или со употреба на новиот алгоритам, како оздравени се регистрирани 1 052 лица.