Втората рата од данокот на солидарност компаниите ќе ја добијат во март следната година
Компаниите кои во 2023 година уплатија средства по основ на Законот за данок на солидарност, во текот на следниот месец ќе ја добијат првата рата од повратот на овие средства.
Од Министерството за финансии потврдуваат дека процесот за враќање на средствата е веќе започнат, а компаниите треба да достават барање за поврат до Управата за јавни приходи.
„Донесен е правилник за изменување и дополнување на правилникот за формата и содржината на образецот на барањето за враќање повеќе или погрешно наплатен данок и веќе е објавен во ’Службен весник’“,
велат од Финансии за МИА.
Државата треба да им враќа пари на дел од компаниите откако во февруари лани Уставниот суд го поништи Законот за солидарен данок кој беше воведен од претходната влада како еднократна, вонредна јавна давачка за 2023 година. Овој данок го плаќаа компаниите што во 2022 година оствариле вкупен приход поголем од 615 милиони денари (околу 10 милиони евра).
Целта беше да се соберат средства за ублажување на последиците од енергетската криза во тој период.
Со поништувањето на Законот за данок на солидарност државата од буџетот ќе треба да им врати околу 49,2 милиони евра на 156 компании, кои ја платиле оваа давачка согласно сега веќе поништениот закон
Втората рата од данокот на солидарност компаниите ќе ја добијат во март следната година.
Министерката за финансии Гордана Димитриеска-Кочоска минатиот месец рече дека конечните листи се веќе направени, обрасците се подготвени и Управата за јавни приходи треба да ги објави на својата веб-страница.
За дел од компаниите што не се согласиле солидарниот данок да биде исплатен на две рати, министерката рече дека не е пресметано за колкава сума станува збор за нив бидејќи имаат намера уште еднаш да разговараат, а за тоа, како што кажа, „до март има време и простор да се убедиме“.