Речиси идентична реакција и барања во вторникот до Владата упати и опозицискиот Социјалдемократски сојуз на Македонија, од каде што рекоа дека власта наместо да спроведе транспарентна и законска постапка за изградба на новиот дистрибутивен систем за природен гас, зад затворени врати подготвила нелегален меморандум за соработка со турската компанија
Алијанса на Албанците на доскорешниот министер за здравство и експартнер во коалицијата ВЛЕН, Арбен Таравари, сега во опозиција денеска остро ја осуди одлуката на Владата за потпишување меморандум за соработка со „Казанџи холдинг“ и бара негово итно укинување.
Повод за реакцијата и барањето на крилото на Алијанса за Таравари се наводите на кои пред три дена се осврна и опозицискиот СДСМ дека подружничко претпријатие на холдингот, „Акса енерџи“ е предмет на истраги за корупција во Гана.
Според Алијанса, овој потег на Владата претставува сериозно прекршување на Законот за енергетика и голем ризик за енергетската иднина и јавниот интерес на граѓаните на Република Северна Македонија.
„Наместо да спроведе транспарентна и конкурентна тендерска постапка, како што јасно е предвидено во членот 94 од Законот за енергетика, Владата одлучува да склучува договори на таен и сомнителен начин, без никаква длабинска анализа за економските, еколошките и општествените последици“,
велат од партијата.
Оттаму додаваат и дека оваа практика ги зголемува сомнежите дека партиските и личните интереси се ставаат над јавниот интерес, а граѓаните ќе бидат тие што ќе ја платат цената за проект што, како што наведуваат од партијата на Таравари, е спротивен на стратешката насока на земјите од Европската Унија.
„Додека земјите членки на Европската Унија се оддалечуваат од природниот гас, Владата гради нови дистрибутивни мрежи за енергенс што е поскап и поштетен за климата и за семејниот буџет“,
наведуваат од Алијанса.
Од партијата наведуваат и неколку прашања кои, како што велат Владата, треба да ги одговори:
• Зошто се прекршува Законот за енергетика и се заобиколува законската постапка за избор на партнер?
• Дали е направена анализа за реалните потреби од гасификација и трошоците за граѓаните?
• Дали постои стратегија за развој на енергетскиот сектор за наредните 20 години, како што е законска обврска?
• Какви гаранции му се дадени на странскиот инвеститор за да биде „убеден“ да инвестира 1 милијарда евра?
„Партнерството со компанија вмешана во меѓународни корупциски афери е аларм за организирана корупција на високо владино ниво и бара итна истрага од надлежните институции, вклучувајќи го Јавното обвинителство и Државната комисија за спречување на корупцијата“,
велат оттаму.
Поради ова, од Алијанса за Албанците бараат итно поништување на меморандумот и отворање на јавна дебата за енергетска безбедност и долгорочната насока на енергетските политики во земјата.
Речиси идентична реакција и барања во вторникот до Владата упати и опозицискиот Социјалдемократски сојуз на Македонија. Оттаму рекоа дека власта наместо да спроведе транспарентна и законска постапка за изградба на новиот дистрибутивен систем за природен гас, зад затворени врати подготвила нелегален меморандум за соработка со „Казанџи холдинг“.
„Овој потег не е само заобиколување на Законот за енергетика, туку и директен удар врз енергетската иднина и безбедност на Република Северна Македонија. Замислете, во земјите од ЕУ граѓаните се исклучуваат од природниот гас и своите гасни бојлери ги заменуваат со топлински пумпи, а кај нас допрва ќе се градела дистрибутивна мрежа на гас. Сите развиени земји од ЕУ го спроведуваат јасниот план за намалување на употребата на природниот гас во домаќинствата“,
рече во вторникот на прес-конференција портпаролката на СДСМ, Богданка Кузеска.
Таа упати неколку прашања до премиерот Христијан Мицкоски и министерката за енергетика Сања Божиновска, од кое првото се однесуваше на членот 94 од Законот за енергетика, кој налага изборот на партнер за изградба на дистрибутивната мрежа да се врши преку транспарентна тендерска постапка, а според Кузеска, власта го заобиколува.
„Дали власта се подготвува за огромна корупција: Ќе соработува со ‘Казанџи холдинг’ чија фирма ќерка ‘Акса енерџи’ е обвинета за корупција во Гана?“,
исто така беше едно од прашања на портпаролката на СДСМ.
Инаку, истиот ден, односно во вторникот, премиерот Христијан Мицкоски и претседавачот на турската компанија „Казанџи холдинг“, Шабан Џемаил, потпишаа Меморандум за разбирање со кој се отвора патот за реализација на инвестиција за стратегиски енергетски проект во земјава, вреден една милијарда евра.
Како што информираше премиерот на заедничката прес-конференција со претставникот на компанијата, проектот предвидува три главни компоненти – развој на нови капацитети за производство на електрична енергија, изградба на дистрибутивна мрежа за природен гас, како и мерки за зголемување на сигурноста во снабдување со гас.