Двајцата министри посочија дека зборувале и за заедничко справување со енергетската криза и инфлацијата за што Османи рече дека пронашле заеднички јазик дека е неопходна координација со ЕУ и потсети дека Унијата веќе има донесено одлука за заедничка набавка на гас и енергенски. Неговиот холандски колега, пак, порача дека долгорочно е суштински важно да се обезбеди земјите од ЕУ, НАТО и оние кои сакаат да влезат во Унијата, во иднина да не се најдат во ваква ситуација предизвикана од одредени геополитички играчи како Русија
Холандија ќе ги поттикнува сите напори на Северна Македонија за интеграција во ЕУ, порача холандскиот министер за надворешни работи Вопке Хукстра од Скопје при неговата првата посета на земјава.
Знам и потврдувам, рече тој на заедничката прес-конференција со Османи, дека имаше тешки моменти за Северна Македонија. Но, како што порача, тој целосно ги поддржувам сите чекори и напори на земјава за интеграција во ЕУ.
„Со министерот Османи имавме пријатна конструктивна средба, сигурно нема да биде наша последна. Верувам во заедничка европска иднина на нашите две земји. Денес зборувавме како Северна Македонија планира да ги зајакне реформските напори, веќе работите на тоа, и какви се вашите подготовки за спроведување на идни реформи. Секогаш, како и секој пат, патот на пристапување кон ЕУ бара време, зборувавме во детали за тоа, како Холандија може да помогне, зборувавме за транспарентност, јавна доверба и борба против корупцијата. Би сакал од име на Холандија да нагласам дека ние ќе продолжиме да ги поттикнуваме сите напори на вашата земја во правец на интеграција во ЕУ. Ова е најдобар начин да ја зајакнеме ЕУ. Со задоволство ќе дадеме поддршка на Северна Македонија во заокружувањето на сите напори за конечно зачленување во ЕУ“,
рече холандскиот министер.
Хукстра рече дека на средбата со Османи, тимовите од двете земји ја потврдиле силната поддршка за Украина и украинскиот народ и порача дека е неопходно да се стави крај на руската агресија.
„Би сакам да истакнам пофалби за Северна Македонија што застана заедно со НАТО партнерите во поддршка на Украина, покажувајќи го единството. Северна Македонија помогна и со испорака на оружјето“,
рече шефот на холандската дипломатија.
Османи, пак, рече дека му објаснил на колегата од Холандија што прави Северна Македонија во пресрет на тоа што наредната недела ќе го отвори првиот кластер во делот на скринингот, како и за тоа со кои предизвици се соочува.
„Задоволство беше да слушнам дека Холандија е спремна да продолжи и да ја интензивира поддршката во подготовката на земјата за исполнување на критериумите за членство во ЕУ“,
рече Османи.
Одговарајќи на новинарско прашање, двајцата министри посочија и дека зборувале за заедничко справување со енергетската криза и инфлацијата за што Османи рече дека пронашле заеднички јазик дека е неопходна координација со ЕУ и потсети дека Унијата веќе има донесено одлука за заедничка набавка на гас и енергенски.
Според најавите, рече тој, на формалниот состанок на ресорните министри во ЕУ ќе бидат поканети и министрите за економија и енергетика од Западен Балкан со цел да се вклучат и да бидат запознаени со одлуките.
Дека е време да се покаже единство порача и неговиот колега од Холандија.
„Она што за мене е сосема јасно дека и натаму мораме да ја поддржуваме Украина, ова бара упорност и едноставно не можеме да се откажеме. Не се работи само за иднината на Укриана, туку и за иднината на нашиот континент. Но, исто така можеме да видиме дека граѓаните и деловните субјекти во сите земји од ЕУ и во овој регион се соочуваат со тешкотии заради енергетската криза и инфлацијата. Ова е време да покажеме единство. Ќе се одржи состанок на ЕУ на министрите задолжени за енергија, ќе присуствуваат и министрите од земјите од Западен Балкан и така треба да биде. Долгорочно, од суштинска важност е да обезбедиме дека државите членки на ЕУ, на НАТО и оние кои сакаат да се приклучат на Унијата нема повторно да се соочат со ваква ситуација предизвикана од одредени геополитички играчи. Се соочивме со ковид кризата, сега и со оваа криза, меѓутоа долгорочната цел е да го консолидираме нашето единство и заеднички одговор“,
рече Хукстра.