Амбасадорката Нивес Тигањ во интервју за Радио Слободна Европа вели дека очекува позитивен исход за нашата земја до крајот на овој месец
Самиот на ЕУ во Загреб, кој треба да се одржи во мај, има друга димензија и тој всушност е погрешно перцепиран, во смисла дека тогаш би можело да има некаква одлука за Северна Македонија. Ние сакаме до самитот во Загреб да се дефинира, односно постигне консензус меѓу сите земји членки за Северна Македонија да отвори преговори со Европската Унија, вели во интервју за Радио Слободна Европа хрватската амбасадорка во Македонија, Нивес Тигањ.
Таа вели дека очекува позитивен исход за нашата земја до крајот на овој месец. Нагласува дека Хрватска, како претседавач со ЕУ, се ангажира да се постигне консензус меѓу државите членки, со цел одлуката на Советот на ЕУ да биде позитивна.
„Европската комисија го објави извештајот за напредокот за Северна Македонија и Албанија на 2 март. Извештајот е позитивен и Комисијата всушност го повтори претходниот став дека и двете земји, и Северна Македонија и Албанија, заслужуваат отворање на преговорите. Знаеме каква беше одлуката во октомври минатата година. Секако дека очекуваме и веруваме во позитивен исход на тоа што треба да се случи на крајот на овој месец. Токму на денот на објавување на извештајот на Комисијата, хрватскиот министер за надворешни работи и европски прашања беше во работна посета во Тирана и во Скопје, каде што уште еднаш ја потврди силната поддршка на Хрватска во натамошното придвижување на двете земји во евроинтегративниот процес. Значи ние веруваме, како земја претседавач со Советот на Унијата, и силно сме ангажирани да се постигне консензус меѓу државните членки со цел одлуката на Советот на ЕУ да биде позитивна“
вели Тигањ.
*Поврзани вести: Прес-конференција Димитров-Радман: Извештајот покажува дека Северна Македонија оди во добра насока
ЕК го објави мини-извештајот – Северна Македонија ги зајакна реформите и треба да почне преговори