На 20-годишниот М. К. од Пожега, кој до смрт го претепа својот пријател, му е одреден притвор, пренесуваат хрватските медиуми. По распитот во Жупаниското државно правобранителство, адвокатката на напаѓачот во изјава за хрватски „Данас“ вели дека тој ја признал вината.
„Притворот е одреден, поради можноста да се влијае врз сведоците. Во своето излагање осомничениот детално објасни што и како се случило, признал дека го сторил делото за кое се товари. Ќе поднесеме жалба, сведоците немаат што да кажат освен неговото признание“
вели адвокатката Анита Пезер.
М .К. се сомничи дека во саботата, околу 02:15 часот на паркинг на плоштадот „Свето тројство“ во Пожега, по кратка вербална расправија, физички го нападнал 21-годишниот Јаков Бочкај. Нападот бил снимен од безбедносните камери и како што претходно објавија хрватските медиуми, откако паднал, напаѓачот брутално продолжил да го удира со клоци. Тој потоа се оддалечил од местото, оставајќи го другарот да лежи на земја. Дел од медиумите пренесоа дека полицијата го лоцирала недалеку од местото на злостворството, се однесувал како ништо да не знае и дека се понудил да помогне.