Косовскиот премиер упатил честитки за значајните промени, исклучителните реформи и напредокот што го постигна Северна Македонија
Покрај претседателот на парламентот Талат Џафери, денеска и лидерот на ДУИ Али Ахмети остварил средба во Собранието со косовскиот премиер Авдула Хоти, кој е во официјална посета на Скопје.
Ахмети и Хоти, како што соопштија од ДУИ, разговарале за проширување на соработката меѓу двете земји, со цел стабилност и просперитетот во регионот.
Ахмети му честитал на Хоти за постигнатиот договор
во Вашингтон, кој, како што се оценува, го отвора патот за заемно признавање меѓу Косово и Србија и истовремено овозможува интеграција во НАТО и во Европската Унија, како единствениот начин кој гарантира подобар живот за сите граѓани на Балканот.
Ахмети, како што се наведува, разговарал и за достигнувањата на Северна Македонија, посочувајќи ги и договорите со Атина и со Софија и ориентацијата на земјата кон ЕУ.
Ахмети му порачал на Хоти дека компромисите на Северна Македонија со Грција и Бугарија треба да бидат референтна точка
за дијалогот Косово-Србија.
На крајот од состанокот, лидерот на ДУИ истакнал дека
Северна Македонија ќе го поддржи Косово во спроведувањето на
неопходните и важни реформи, со цел да се поддржи владеењето на правото и правилното функционирање на косовските институции.
Џафери, пак, на средбата со Хоти, оценил дека испраќањето на 44 припадници на Армијата на Северна Македонија во составот на КФОР, како наша прва ротација во мисија предводена од НАТО, ќе придонесе за натамошната стабилност како на Косово, така и целиот регион.
Хоти, од своја страна, како што соопштија од кабинетот на Џафери, упатил честитки за значајните промени, исклучителните реформи и напредокот што го постигна Северна Македонија, оценувајќи дека со тоа е создаден нов моментум за развој и стабилност на целиот регион. Тој се осврна на состојбата во Косово, особено на планот на евроинтеграциите и го нагласи интересот за реализација на проекти за меѓугранична соработка меѓу Северна Македонија и Косово, финансирани од ЕУ.